辟邪归正
辟邪归正 目录
辟邪归正目录 519
客话卷一 522
第一节 上帝存在 522
第二节 上帝全善 522
第三节 善恶自主 522
第四节 上帝生恶物之意 523
第五节 上帝唯一 523
第六节 上帝是万物根源 524
第七节 上帝无终 525
第八节 上帝无形而可信 525
第九节 教之真假不在帝王 526
第十节 圣贤恭敬上帝 527
第十一节 儒生亦当从耶稣教 529
第十二节 不拜孔子 529
第十三节 不拜祖宗 530
第十四节 不立牌位 531
第十五节 烧纸无益 532
第十六节 不祭坟墓 534
讲论祭坟墓嘅根源 534
客话卷二 536
第十七节 祭祖非孝 536
第十八节 不拜死人 536
第十九节 天堂地狱 537
第二十节 灵魂不灭 537
第二十一节 神人鬼之别 538
第二十二节 真神许魔鬼在世 538
第二十三节 赏恶罚恶之公义 539
第二十四节 上帝不遽罚恶人 540
第二十五节 贫富不可均 541
第二十六节 耶稣胜过圣贤 542
第二十七节 耶稣的牺牲救赎 543
第二十八节 信耶稣的凭据 543
第二十九节 领洗礼的意义 544
第三十节 女人亦入教 545
第三十一节 教中之诫 546
第三十二节 假信徒 546
第三十三节 耶稣教非外国的教 546
第三十四节 不可拜假神 547
第三十五节 大意论拜神嘅法 547
第三十六节 论异端 548
第三十七节 大意讲论靠风水生祸 548
客话卷三 550
第三十八节 讲论择日与拣方向嘅假处 550
第三十九节 讲论算嘅假 550
第四十节 讲论看相嘅假处 551
第四十一节 讲论占卦求签测字嘅假法 551
第四十二节 讲论菩萨满下係假 552
第四十三节 讲论帝王有封神嘅权 553
第四十四节 讲论玉皇 553
第四十五节 讲论老君或称老聃 553
第四十六节 讲论真武 554
第四十七节 讲论文昌 554
第四十八节 讲论关公 555
第四十九节 讲论城隍 555
第五十节 讲论土地 556
第五十一节 讲论社稷 556
第五十二节 讲论真君 556
第五十三节 讲论宴公 557
第五十四节 讲论天后 557
第五十五节 讲论张天师 558
第五十六节 讲论神仙 558
第五十七节 讲论双忠 559
第五十八节 讲论三山 559
第五十九节 讲论佛 559
第六十节 讲论轮回嘅假 560
第六十一节 讲论观音嘅假 561
第六十二节 讲论阎王嘅假 561
第六十三节 讲论杂神 561
第六十四节 讲论乜嘅缘故圣会唔准人娶妾 562
第六十五节 讲论传人做乜嘅离开屋家唔服事亚爸亚呢 562
第六十六节 讲论一只人唔好话进教係极难嘅事 563
第六十七节 讲论世间人虽然行善也唔可以得天堂嘅真福 564
第六十八节 讲论入教唔可以延迟 564
客话卷一
第一节 上帝存在
客问：汝等入教嘅人，诚心服事上帝，请问上帝两只字係样边解呢？
答话：上帝两只字，唔係天，唔係地，唔係理，唔係道，唔係气，唔係性，唔係人，唔係物件，也唔係鬼神，係造天地与人、又造万物嘅大主宰，係天下万人嘅天亚爸，係万王个王。冇起头，冇结尾，无所不能，无所不知，又极慈善至尊贵嘅，冇有可以与佢比得，如同天地万物嘅头脑，国家有君王，屋家有家长，又像完身有头，孻子有亚爸，树木有根，水有源头。若係国家冇君王其国中就哙乱；屋家冇家长，其屋家就哙冇人料理；完身係冇头颅，就唔生活得；水係冇源头，就冇长流；故所以冇上帝，就冇天地人类。万物啰咁样看起来，详细来查察下子，一看倒有天有地，又有人类与各样物件，就必定有造天地万物嘅头脑，即係上帝，唔使思疑啰。
第二节 上帝全善
客问：上帝样边话得佢係无所不知、无所不能、又全备慈善嘅呢？
答话：上帝从冇中造倒天地万物，唔用材料，唔使心力，唔使拣日子时辰，喊佢有就有，喊佢成就成就，喊佢生就生，喊佢死，即时就死，故所以佢係无所不能。上帝唔单止晓造天地万物，兼且知天地万物嘅性情来安排佢，使倒各样都有所在来保存天下万人。或者善，或者恶，各人心肝藏紧嘅念头满下都明白。有赏有罚，故所以佢係无所不知。上帝做万样全完嘅头脑，万样到好嘅根原，冇一的缺乏，天地间至好嘅。满下在上帝噔来，故所以话得係全善。
第三节 善恶自主
客问：真神上帝，既然全备尽善，样边讲世界上，还有恶心嘅人呢？
答话：真神上帝，畀倒人嘅灵性，本来係全备尽善。好比中国四子书，孟夫子都有讲，人嘅性情，本来係极善，如同水嘅性情，由上流到下；人冇有唔善，水冇有唔流下。就係因为上帝畀倒有只自主嘅心，学习善就善，学恶就恶。又中国《三字经》书中都有写倒话：“人之初，性本善”，意思即係话。人自始初出世当时，性情本来係全善。故所以人嘅性情，或者是，或者非，或者善，或者恶，自家嘅心，必定明白。有只自主嘅心，若係人冇自主嘅权，样边晓行慈善，积功劳，必定与该等飞禽走兽冇乜嘅分别。兼且人行为作恶，满下由自家心里主张，唔係真神上帝使倒佢行恶。好比亚爸亚，养倒子女，满下也望佢做全备尽善嘅人，但係其中还有唔守法律嘅子女，唔听教导又还唔孝顺。咁样看起来，係亚爸亚嘅意思唔呢？
第四节 上帝生恶物之意
客问：真神上帝，係全备尽善，生倒万物来养人。样边讲，又生倒等极恶嘅野兽、毒蛇、虫豸、来害人呢？
答曰：这等极恶嘅野兽，与毒蛇虫豸，虽然佢哙害人，但係也可以有益畀人，不过吾等嘅智慧见识，十分浅薄，唔知其益处来用唔止。汝等爱查察下子，这世界上有好多人，将该等虎骨与熊胆，用佢来做药，又用蜈蚣虫与蝎子来医病。可见真神上帝，所造各样生物係想表明白，佢係无所不能，将各样至好嘅生物满在这天下。好比有光有暗，就成得日晨头与晚晨头。设使有光冇暗，样边分得出昼夜呢？有白冇乌，样边分得出彩色呢？有甜冇苦，又样边分得出五味呢？故所以各样物件之中，唔论大小好丑，满下也係有益畀唔等。有善兽可以帮助吾等，修心积德来受上帝嘅赏；有恶兽可以责备吾等嘅罪，怕受上帝嘅谪罚。可知人就爱查察其嘅理由，唔好怨恨上帝，生倒恶兽来害人啰。
第五节 上帝唯一
客问：上帝既然係至尊贵，又冇有可以与佢比得，可见上帝係一位。但係天地咁阔大，又有万样物件，竟係一位大主宰，样边料理得咁多呢？
答话：天地万物独係有一位主宰，如同国家独係有一只君王。屋家竟係有一只家长，完身又单係有一只头颅。若使一国有两只君王，其国就哙乱；一家有两只家长，其家必定哙分；一身有两只头颅，就哙变做怪物。中国四书，孟子都有讲：“天无二日，民无二王。”意思即係话天上冇两只日头，子民冇两只王帝。咁样看起来，就知天地独有一位至尊贵嘅主，唔可以有两只主？若使有两只主，必定哙互相争夺。汝等爱看天上嘅日头、月光与各样嘅星宿，每日每夜照次序来行动，自古时到今日，千古万年以来，冇一的差错。又看地下该等草与树木，四季轮流来生，春天当时就生叶，夏天当时就开花，秋天当时就结果，冬天当时就凋谢，冇的紊乱。可见天地间独係有一位主宰，就可以料理全完啰。
第六节 上帝是万物根源
客问：天地万物，满下也係真神上帝造倒，又知天地万物，独係有一只主料理。但係真神上帝，佢自家在那里生下来呢？
答话：真神上帝，做万有嘅根源，做万物嘅起头。但係佢自家，就冇起头。若使另外有一只来生倒真神，！就唔话得佢係真神上帝啰。人若係爱问佢生嘅，係那侪生，由咁样算竟去，样边有尽头呢？故所以万物嘅起头，万有嘅根源，即係上帝。除开上帝以外，唔可以再有生上帝嘅人。好比算数噔，万就从千来，千由百来，百在十里来，十又係从一起头。除开一以外再唔可以有一。设使又有一，加落一去添，就成做二啰。所以一做数目嘅起头，做万千百十嘅根源，又样边使问一，在那里来呢？又好比该等树木，其叶花蕊，完尽在枝杇生出来，枝杇由树身生起来，树身从根发生来，可知根係树身、枝叶、花蕊嘅原头。又做乜嘅爱问根在那里生出来呢？谁不知世间嘅人类，与该等鸟雀野兽，也都係咁样。现今嘅人，必定由亚爸亚所生，亚爸亚也係从亚公亚婆出下，係咁样，一代还一代算竟去，到起初造天地当时，就必定有一男一女，在众人嘅先，做万民嘅始祖，再冇别人在始祖嘅先。但係始祖从那侪生，就係真神上帝造倒嘅。故所以称佢係真神，做天地万物嘅头，也係吾等世人嘅天亚爸，人好唔奉事敬拜时。
第七节 上帝无终
客问：真神既然係冇起头，係做万物嘅起头，吾又请问下，样边讲话佢係冇结尾呢？
答话：大概有起头嘅，必定有结尾。如同人嘅肉身，与飞禽走兽，这等满下也有起头，有结尾。但係真神，係冇形样，既然冇起头，样边还有结尾呢？但係称佢无所不知、无所不能、无所不在，永远生活嘅真神就係啰。
第八节 上帝无形而可信
客问：真神上帝，既然係有，请问下有那侪看得倒呢？
答话：爱知吾等所敬拜嘅神，就在四书五经所称该位上帝啰。真神係冇形冇样，好比《诗经?大雅》篇，也有写倒话：“上天之载，无声无臭。”“其意思係讲上帝在天，係冇声冇气。又四书《中庸》篇，有写倒话：“视之而弗见，听之而弗闻。是故君子戒慎乎其所不睹，恐惧乎其所不闻。”其意思即係话，想看佢，又看唔倒；想听其声，又听唔倒。故所以成做君子嘅人，佢行为作事，虽然人看唔倒，其心也时常谨慎，狂人看倒。其嘅心思说话，虽然人听唔倒，佢也小心，狂畀人听倒。若係冇一位冇形冇样嘅真神，这只君子，佢所嘅係那侪呢？咁样看起来，就知有一位真神主宰啰。又好比人噔，佢唔曾亲眼见过其祖公，时佢敢话其先代冇祖公吗？故所以明白嘅君子，查察其道理，就知有本有末。如同看倒一间屋，就知始初有木匠师傅造倒嘅；看倒有光，就知有日头；看倒烟，就知有火；看倒国家有律法，就知有君王，看倒有天地人物，就知有上帝主宰，设使冇祖公，子孙从那里来呢？冇木匠师傅，屋宅样边得成就呢？冇火必定冇烟，冇日头必定冇光，冇君王，国家也冇律法，冇只全能嘅真神，从样边来造化天地人物呢？若係爱亲见嘅正信，唔曾亲眼看倒就唔信，这係至愚蠢嘅人。明白嘅君子人，就唔係咁样，佢独係照理来查察，有理就信，冇理就唔信。譬如古时，有尧舜两只皇，帝今下嘅人，那侪可以亲眼看得倒？单係用《钢鉴》做凭据，用理来查察，必定信有这两只皇帝。设使有唔信，人时唔哙话佢係愚蠢吗？今下吾讲有一位上帝，管理天地人物，明白嘅人，就用《圣经》做凭据，又用理来查察下子，就信佢有，若使咁样都唔信，时唔係至愚蠢嘅人吗？
第九节 教之真假不在帝王
客问：圣教既然係真教，至正嘅道。做乜嘅，该等做帝王嘅人又唔崇拜。若係在上嘅人係咁样行为，在下嘅就哙学样，这係照常嘅规矩。王帝既然进入圣教，其子民满下也哙进教啰。
答话：至紧要，爱知教嘅真假，唔係在乎做上侪有咁样行为，在下嘅人就爱学样，唔可以将这等做凭据。独係爱分出道理，或者真，或者假。若係道理真实，其教就为正；设使道理虚假，其就係邪教。因为一只人，想学人嘅表样，係看倒其真实尽善，然後正从；该等虚假嘅，时可以从佢吗？好比孔夫子都有话，三只人共下行，必定有只我先生。堪当畀吾来学样，吾就爱拣倒善嘅正从；或者恶嘅，吾就爱闪避佢。又同自家亚亚爸噔，也有善恶可以分别。若係父母良善，做子女侪应当爱学其良善；倘使父母凶恶，做子女侪还学其表样唔呢？中国《钢鉴》古书也有写倒，尧、舜、禹、汤、文、武，满下做帝王；桀纣幽厉，也满下做帝王。但係尧、舜、禹、汤、文、武所讲嘅说话、所做嘅事，满下係善。佢在世间，也知用只壮健坚固嘅心，来表明白佢服事上帝，断唔曾敬拜释迦牟尼佛、太上老君，与各样邪神菩萨。这咁好嘅帝王，做在下子民侪应当效法其样。譬如桀纣所讲嘅说话、所做嘅事，满下残害子民。这咁唔好嘅帝王，做子民，时可以学其样吗？凡教或者从或者唔从，唔在乎帝王敬拜与唔敬拜。设使以帝王所敬拜，正从；帝王唔敬拜嘅，就隔绝佢。係咁样，就冇一教可以从得，各样教也可以隔绝佢。因为查考《钢鉴》所载，各样教门，也有帝王与官府出告示，喊人爱遵从佢；也有出告示，禁止人遵从佢。好比秦朝，有只始皇极恼儒教，将儒教该等书完下烧就；将儒教该等读书人，杀死埋开佢。又前汉後汉当时，该等帝王，好多迷惑释教也，唔准子民读儒教嘅书。唐朝当时，迷惑道教，弃绝儒教，凡习儒教嘅人，多有受难来死。宋朝徽宗皇帝，迷惑道教，又隔绝释教。元世祖遵从释教，也禁道教，烧开道教嘅书。又文王当时，有只魏崔浩劝北朝魏王尽杀天下沙门各佛像。虽然有迷惑道教与释教嘅人，但係也有遵从真道，出命令喊人爱传嘅。查考《西安景教碑》所记，唐朝时贞观十二年，宣传命令，满世间爱遵行真道，各州府县准子民建筑教堂。又明朝，万历初初嘅时，有一只宰相，崇信真道，係上海县人，姓徐其名安做光启，查考天道溯原就知。也有清朝康熙君，在北京，题只匾额，畀基督教咁样写倒：“万有真原。”又有对联写倒咁样话：无始无终，先作形声真主宰。宣仁宣义，聿昭拯济大权衡。至到道光二十五年，细查天下各教，正知这基督教，真实全善，与别样异端邪教大不相同。准中外人民传教习练，唔准禁止，又准各处设立教堂，劝人行善，确实有好大益处畀子民啰。
第十节 圣贤恭敬上帝
客问：四书五经，所称赞该等圣人与贤人，至广究嘅。就係尧、舜、禹、汤、文、武、周公、孔、孟、颜、曾、游、夏这等圣贤人，在世当时，佢唔曾讲有真主，也唔曾讲有真神两只字。做乜嘅汝等唔遵圣贤嘅说话，又造出真神两只字，来敬拜佢呢？
答话：吾在先，既然讲明白，爱知吾等所敬拜嘅真神，即係四书五经内所称嘅上帝。真神两只字，与上帝两只字声音虽然唔同，其嘅意思有乜嘅分别。真神嘅意思因谓世间有好多假神，故所以加一只真字来分别。上帝嘅意思，因各国嘅王也称帝，故所以加一只上字来尊敬佢。好比《诗经?大雅》篇有写倒话：“殷之未丧师，克配上帝。”意思係话殷朝唔失得天下，因佢有德行来待子民，就得倒上帝来矜恤佢。朱子佢也解明白，上帝係天地嘅主宰。又《诗经?小雅》篇有写倒话：“有皇上帝，伊谁云憎。”意思係话，係至大嘅上帝，佢冇私心来憎恼人。程子也话，天係属形体，主宰天嘅就係上帝。既然朱子、程子两只人所讲解真神两只字，声音虽然有分呷，但係其意思就相同，係咁样，就知吾等敬拜嘅真神即上古圣贤人所敬嘅上帝。但係世间该等人，閗多喊上帝嘅名，犯倒真神第三诫，其罪就好大。有等称玉皇做上帝嘅，有等称真武做上帝嘅，又有等称太上老君做上帝嘅，也有称协天做上帝嘅，故所以吾等就称真神上帝来分别，唔与邪神来紊乱。真係可惜，现下该等人，少所见，多所怪，唔查究根本，閗多称有生有死嘅人做上帝。谁不知该只老君，生在周朝，玉皇生在汉朝尾，协天生在後汉，真武乃明朝所对，样边称得做天地嘅主宰呢？佢等唔曾出世当时，先有天地万物，可见佢等係生在有天地嘅後，样边还称得做天地万物嘅主呢？查考四书五经内，只见尧、舜、禹、汤、文、武、周公、孔、孟恭敬服事上帝真主，唔曾听佢敬拜老君、玉皇与各样邪神，好比书经《汤誓》篇有写倒话：“夏氏有罪，予畏上帝，不敢不正。”意思係话，夏桀无道德，残害子民，其罪该当谪罚；汤王敬畏上帝嘅命，唔敢唔去，改除夏桀嘅罪。又曰：“予小子履，敢用玄牡，敢昭告于皇皇后帝。”其意思话，履係属小子，样边敢用黑朱礼来改变，故所以吾敢胆表白我心畀上帝。又曰：“惟皇上帝，降衷于下民。”意思係话，独有至大嘅上帝，用只分道心，畀吾等子民，有的横歪嘅，武王曰：“既获仁人，敢氏承上帝，以遏乱略？”意思咁样讲，武王话，既然得倒仁人君子，佢就敬奉上帝嘅命，来平静当时嘅乱事。又周公曰：“上帝引逸。”其意思係话，上帝畀倒安乐，夏桀来享；佢翻下转，用只恶心来待子民，上帝就弃绝佢。又曰：“维时不保，降者兹大丧。”意思係话，有成时子，上帝唔保护来讲，就畀好大灾难吾等当。又《诗经?大雅》篇有咁样写倒：“维此文王，小心翼翼，昭事上帝。”意思係话，文王用只恭敬嘅心，来表明佢服事上帝。又曰：“上帝临汝，无贰尔心。”意思係话，上帝与吾等共在，唔好讷佢有偏心。又曰：“文王陟降，在帝左右。”意思係话，文王佢或者升高或者打低，佢也在上帝嘅左右。又曰：“皇矣上帝，临下有赫，监观四方。”意思即係话，至大嘅上帝，其圣名在这世间好广究，时常监察天下万民。又曰：“荡荡上帝，下民之辟。”意思即係话，至大嘅上帝，係万民嘅君王。《周颂》曰：“无竞维烈，不显成康，上帝是皇。意思係话，成王、康王两只人嘅德行，冇人可以与佢比得，独係上帝就大过佢。”又曰：“於皇来牟，将受厥明，明昭上帝。”其意思即係话，春天尾当时，上帝所赐嘅麦；既然成熟，吾等爱体贴上帝苦心，来多谢佢。《商颂》曰：“圣敬日跻，昭假迟迟，上帝是氏。”意思係话，汤王得上帝畀生命，既然好久，故所以佢爱敬畏上帝。孔子曰：“郊社之礼，所以事上帝也。”意思係话，郊礼係祭天，社礼係祭地，故所以郊社嘅礼即係敬拜上帝嘅礼。孟子曰：“虽有恶人，斋戒沐浴则可以礼上帝。”意思係话，孟夫子咁样讲，虽然有极丑陋嘅恶人，佢晓洁净其心，也可以服事上帝。明道先生有咁样话，天下嘅贤人，满下係上帝嘅臣子。夏商周三代嘅书内，所称上帝嘅名十分多，好难完尽写出来，今下大略讲几只，来做凭据。可见早时该等王帝，与该等圣贤人，所敬拜倚赖嘅，独係真神上帝，也都证得出吾等入教人，恭敬服事上帝，就合早时帝王圣贤嘅教导啰。汝待弃绝上帝，翻下转拜菩萨，就係背逆古圣贤嘅道理，时唔係使人可惜佢吗？
第十一节 儒生亦当从耶稣教
客问：照咁样谈论，可知耶稣，实在係正教。但係孔子嘅儒教，也可以称做正教，做乜嘅从儒教都唔够，又还爱从耶稣教呢？
答话：爱明那样唔够，至紧要，先行查考道理。好比儒教该只儒字，其意思，係称读书人嘅名词，话佢极好学，明白古时与今下嘅事，分别那等係邪，那等係正。查考夏商周该等读书人，独係服事上帝真主，唔拜邪神，咁样就话得真儒教，现今从儒教嘅读书人。其喙读圣贤说话，但係唔照圣贤嘅道理来行，閗多去从该等邪教，好打酒醉，贪心又行奸淫，冇开自家良心。或者拜如来佛，或者拜太上老君，想咁样来得福；或者拜文昌来求名，唔分别真假，唔查考虚实，如同浊水与清水共下流噔。又烧衣化宝，打斋做醮，与食醉酒在梦床，唔知人事噔。係咁样嘅人，称做儒教，实在好羞耻。吾等入教嘅人，就唔係咁样，独係爱谨慎其说话，小心其行为，听从耶稣遗下嘅教训，同心服事真主，守上帝诫命，闪避异端，远隔邪教，弃绝淫行，去假归真，独独行正道，就係耶稣嘅真门生。又四书论语篇，都有写倒话，四海之内，皆为兄弟。意思係讲，生在天下间嘅人类，满下也係兄弟，爱相亲相爱，和和气气，如同一家噔，有过失，就爱劝戒，有善事，就爱勉励来行。互相忍耐，互相仁爱，在生同拜一只神，同倚赖一只主，等到来世，灵魂得救，享天堂冇穷尽嘅福。咁样看起来，时好唔入耶稣教吗？
第十二节 不拜孔子
客问：汝等入教人，知係真儒教，又读孔夫子书，样边讲唔拜孔夫子，係乜嘅缘故呢？
答话：孔夫子所讲嘅等说话，来教後世人，独係劝人，小心恭恭敬敬，表明自家嘅心，服事上帝，佢也唔曾讲教人爱敬拜佢自家。好比有话，郊社嘅礼係敬拜上帝嘅礼，也唔曾讲用郊社嘅礼来拜孔子；又话“获罪於天，无所祷也。”其意思即係话，得罪上帝，冇那里好祈求祷告啰。明道先生也有话，天下嘅贤人，满下係上帝臣子，可见孔也係上帝嘅臣。兼且孔子又话，“天生德於予。”意思係话，其嘅生命德性，係上帝畀倒。可知使孔子生在世间，係上帝主意。既然係上帝主意，做乜嘅还使拜孔子呢？又俗话，侪侪都有讲，孔子係万民嘅先生，应当爱敬拜。吾回答话，孔子也有先生，四书论语有咁样写倒：“我非生而知之者，好古敏而求之者也。”其意思即係话，吾唔係出开世乜嘅都晓，係勤力好学正知嘅。又三字经有写倒，“昔仲尼，师项槖。”其意思係话，孔子佢尊敬项槖，来做其先生。若係孔子爱敬拜，也应该爱拜孔子嘅先生正着。係咁样跟寻来拜，跟到至先行起头该只係那侪呢？即係真神上帝。又係天下各国万民嘅天父，天下万民嘅生啰，所以吾等入教嘅人，敬拜上帝，实係遵孔子嘅教导。汝等唔拜上帝，翻下转拜孔子，唔单止得罪上帝，兼且还得罪孔子添。
第十三节 不拜祖宗
客问：照咁样辨明白来讲，可知真神係天地人物嘅大主宰，应当爱敬拜。但係吾嘅祖宗，係生身嘅大父母，也唔好忘记。好比曾子都有讲，“慎终追远，民德归厚矣。”汝等入教嘅人，唔拜祖宗，係乜嘅缘故呢？
答话：汝想明白乜嘅缘故，先行爱解明白祖宗两只字。祖者本也，宗者根也。人类嘅根本，就係祖宗，生自家完身，係肉身嘅亚爸，亚爸完身，係亚公所生，亚公嘅完身，係太公出下，由咁样来推算，算到初开天地，该只始祖止，就係生吾等始祖公该位上帝啰。因为上帝係人类嘅根本，係祖宗嘅祖宗，所以敬上帝，如同拜祖宗一样。若使唔敬拜上帝，就係丢弃祖宗。好比树冇根，就唔晓生枝叶；水冇源头，就唔晓长流；人类冇始祖，今下该等人，在那里生下来呢？汝等拜祖公，照家中刻倒嘅神主牌，不过係二三十代，照祠堂所刻倒嘅，也不过係百零代止，在百代以前，时有老祖公所生吗，设使冇老祖公，尔屋家该等祖公，从那里来呢？若係既然有老祖公，做乜嘅独係拜新祖公，唔拜该只老祖公呢？咁样看起来，係与贪新忘旧噔。详细来讲，新从老该里来，老又係在新该里结末。新祖当拜，老祖公更过爱拜，因为佢係祖宗嘅祖宗，时唔知孔子有话，“物有本未，事有终始。知所先後，则近道矣。”意思係讲，凡物件有根本，有结末；凡事有起头，有结尾。知其或者在先，或者在後，就近道理啰，今下汝等敬拜祖宗，不过係拜其结末，唔曾拜其根本。拜其结尾，唔曾拜其起头，话得係离开道理好远啰。今下吾又讲，慎终追远嘅道理汝听下子。慎终两只字该意思，即係话父母临死该当时，做子女侪应该尽自家嘅本分，时常在父母该左右，尽心尽力来服事佢，帮助佢，安慰佢，使佢安乐来去世。死後又爱尽本分，预备便衣裳棺材，来埋葬其尸骸，这咁多样，就係慎终两只字嘅意义啰。追远两只字其该意义，又还讲下添，即係追念祖公父母嘅恩情，唔好忘记，又爱守紧遗嘱教人该等好说话，唔好忽略，这就係追远嘅意思啰。但係汝等独係拜几代嘅祖公，唔可以话得係追远，不过係追近止。若想追远，应当爱追到人类嘅根本，正可以话得係追远。这里所讲根本，係样边意思，即係话上帝。所以吾时常有讲过，係敬拜上帝嘅人，佢有祖宗；唔敬拜上帝嘅人，就冇祖宗。又汝等拜祖公所用嘅礼物，不过将酒饭鱼肉摆紧在神主牌嘅面前，或者烧等纸钱，或者烧等纸宝，或者烧等香烛，就係话用咁样礼物，来表自家孝心。照吾看，实係至愚蠢嘅，样边讲呢？看汝摆所有嘅酒肉茶饭，久必定色变味臭，唔曾看倒祖公来食。既然冇来食，摆紧又有乜嘅益呢，好比祖公係想饮食，样边讲独係拜新祖公，唔拜老祖公，时老祖公唔哙饿死吗？
第十四节 不立牌位
客问：汝等唔做神主牌，样边话得係敬祖公呢？
答话：敬祖公与唔敬祖公，唔在乎做神主牌。因为人照俗例设倒嘅，唔係真神着发嘅天道。查考早时人祭祖公，用孙子来做尸，设倒其衣裳，装模作样，就用各样酒肉，来献祭佢，敬拜该只生人如同敬祖公噔。但係在後有等人，就嫌弃咁样形式唔好，因为亚爸拜孻子，亚哥拜老娣噔，好像人伦错乱噔。因咁样就改开佢，立过神主牌。可知人设倒嘅礼仪，可以随时变换，唔同天道，唔可以更改。照咁样来讲，立生人做尸，係错乱人伦，故所以爱改开佢。立神主牌来拜，就係亵渎祖公，也唔可以从。这两样比较下，用孙子来做尸，还係祖公嘅血脉，咁样来拜佢，都还可以讲得。若使用几寸木，係冇灵嘅物件，那里都可以放得，咁样来拜佢，又有乜嘅意思呢？又或者话，立神主牌，係记先人几时出世，乜嘅时途去世，使倒唔可以忘记。殊不知先人出世日了，与死该时期，可以写在族谱，唔可以写在神主牌。因为立神主牌，作为先灵在该里，这就係惹倒後代虚假嘅罪。或者又话，神主牌有喃巫先生，用银硃笔点过主，就有先人三魂七魄在该里，若使安佢唔妥当，就话先人唔安，子孙必定唔好。设使祖先确实可以在神主牌住宿，样边讲夏商周该等圣贤人，唔转来责罚其子孙，做神主牌畀佢住呢？吾等入教嘅人，知善人嘅灵魂上天堂，与真神共下住；恶人嘅灵魂落地狱，与魔鬼共下住；满下唔在世间，走落神主牌该里住，故所以唔立神主牌来亵渎祖公啰。
第十五节 烧纸无益
客问：吾等烧纸银宝，係表明做子女孝心。汝等入教人，做乜嘅唔烧纸钱银宝来敬拜祖公，係样边解呢？
答话：讲论纸钱银宝，满下係诱惑害人嘅事。据汝等讲，祖公在阴间，爱银来使用，係咁样，当畀真钱真银佢用，做乜嘅用纸烧灰来骗佢呢？因为纸係竹料造成嘅，既然烧开就变灰，係至贱嘅物件，样也变得成真钱银呢？虽然烧就南山嘅竹，也唔可以使灰变成钱银，咁样看起来，样边还用得倒呢？设使尔祖公在生当时，汝将纸灰做真银来畀佢，唔单止佢唔爱，翻下转，哙骂汝像发颠一样实在係唔孝顺。可见生唔，可以骗，既然死开嘅人，时可以骗佢吗？孔子有话，“事死如事生，事亡如事存。”意思係话，服事死人，爱与服事生人一样，可知烧纸钱实在係冇损有益。查考《钢鉴》古书，夏商周三代当时，唔曾有纸写字，皆用绢布，或者用竹简。既然冇纸，必定冇得烧，时可以话三代当时冇忠臣孝子吗？又时可以话尧、舜、禹、汤、文、武、周公、孔、孟做唔孝嘅人吗？孟子有话，“不孝嘅罪有五，惰其四肢，不顾父母之养，一不孝也。博奕好饮酒，不顾父母之养，二不孝也。好货财，私妻子，不顾父母之养，三不孝也。纵耳目之欲，以为父母戮，四不孝也。好勇斗狠，以危父母，五不孝也。”意思係话，懒惰耕田，唔做工，又唔寻生理做，游手好閒，唔养父母，这係第一件唔孝顺。好赌博，好打酒醉，唔养父母，这係第二件唔孝顺。贪心钱财好私欲，唔养父母，这係第三件唔孝顺。放纵自家耳朵听淫声，放纵自家眼珠，来看淫色，惹倒父母羞辱，这係第四件唔孝顺。好争斗打交，连累父母有危险，这係第五件唔孝顺。照孟子所讲，也唔曾话唔烧纸钱银宝为唔孝顺，独係汝等唔从圣贤嘅说话，唔从先王嘅道理，任由自家意见，妄烧纸钱银宝来骗父母，这就係唔孝顺嘅人？爱知人类死後，灵魂满下爱受上帝赏罚，若係在生行善，必定赏佢享天堂嘅福；在生行恶，当然罚佢受地狱嘅苦。故所以在天堂享福侪，佢也唔爱纸灰来用；在地狱受苦侪，畀纸灰佢也冇益。兼且人死後，唔嫁，唔娶，唔使饮食，也唔著衣裳，除开这几件以外，钱银有乜嘅用呢？人生在世间当时，有肉身嘅形体，必定用有形样嘅物件，故所以爱买各样器具与衣服，来保护其身体，爱买各样食物来养其生命。人死之後，肉身归土，灵魂係冇形冇样，唔可以用有形有样嘅物件。既然唔用各样物件，汝畀钱银佢，有乜嘅用呢？时常看汝等人，烧等纸钱，敬拜祖公，假名话，表明孝心，实係想求福，大约想保佑子孙昌盛、发财、有功名样事。这等念头，实在至愚蠢嘅，故所以冇奈何，爱解明白。佢殊不知，在生做人祖公侪，那侪唔想其子孙昌盛，那侪唔望子孙发财有功名。虽然有想望嘅心，但係冇帮助嘅力。逢着子孙有病，当危险嘅时，虽然至愚蠢，唔孝顺嘅子女，都唔忍心看佢死，到底唔可以保其生命。咁样看起来，眼晓看，喙哙讲说话，手与脚可以行动做事，尚且冇本事保佑子孙生死；况且死後，肉身变土，样边可以保佑子孙昌盛、发财、有功名呢？时常俗语有话，“死生有命，富贵在天。”意思即係话，一只人或生、或死，在乎上帝主意，或者发财、有功名，也係上帝安排。唔曾听倒死生富贵，在乎烧纸钱祖公啰。又查考历代古书，至有贤德嘅人，就係尧舜两只人，佢也唔可以保其子孙有贤德，来接其位，管理子民，因为尧帝孻子，其名安做丹朱，因佢十分唔孝顺，行为作事，极唔合式，故所以其王位，让畀舜帝来接其位。在後舜帝孻子，其名商均，又係极瘪嘅人，故所以其位让畀夏禹王来做。咁样看尧舜两只人，古今称佢做圣洁君王，佢都唔可以保其子孙，何况今下世间，该等庸夫俗子，死後样边可以保其子孙呢？可见烧纸钱银宝，敬拜祖公，或者有益冇益，或者係有表明子女孝心冇，就可以明白啰。
第十六节 不祭坟墓
客问：孔夫子有咁样话，献祭爱用礼，可知礼唔可以废开佢，做乜嘅唔祭坟墓呢，
答话：拜坟墓这件事，始初因为三月初三係清明节，就出门行嬲。在後嘅人，加多祭坟墓嘅事，唔係圣贤人注重佢。好比孔子，三岁当时，死开亚爸；到二十四岁，又死开亚。当时正知其爸该坟墓在防山，就抬其尸骸去该里埋葬，但係自其爸其死後，唔曾听倒孔子拜坟墓。独係有摆落水，冲崩防山坟墓，孔子就哀切来叫。咁样话，吾听倒古时该等人，唔修整坟墓，吾也想学其样。咁样看起来，孔子唔单止唔祭坟墓，该等坟墓佢也唔修整添，至到佢讲献祭爱用礼，不过係徒循虚假嘅礼。因为礼仪嘅形式，出乎人情，人情必定有偏，就唔係尽都合理。在後嘅人，唔遵服事生时嘅礼，独独藉口死後祭事嘅礼，至紧要爱知，实理就遵从，虚礼就爱改除。又魏文营寿陵，有诏命咁样话，骸骨冇痛痒嘅知觉，坟墓係藏骸骨嘅所在，使倒存亡，冇事待慢，係指明祭坟墓係背礼嘅行为，但係今下该等人，照传竟来嘅俗例，作为祭坟墓係孝敬，谁不知做人子女侪，服事父母，设使虚假，其罪十分大。用铜银欺骗生人，尚且有罪，若使用纸钱元宝与各样假物欺骗死人，自家问心，可以安唔呢，兼且纸，係蔡伦在後汉当时正造倒，元宝係宋武帝所称嘅钱名，孔子在春秋当时，唔曾有用这等祭，更过明白，故所以做人子孙侪，应当在生时爱孝敬，设使父母死後，就爱因时候来扫墓，除净该等草与树仔，加等泥土去添，来记念佢。唔好做欺骗嘅事，就做得啰，时好照世俗规矩来做虚假事吗？故所以吾等，父母在生当时，就孝敬服事，死开用礼埋葬佢，係遵古人实在嘅礼。
讲论祭坟墓嘅根源
查考祭坟墓嘅事，始初见倒在周朝，在後秦汉两朝，就好多人行咁嘅礼。周礼有话，祭坟墓为尸，又话成葬就祭坟墓，孔子有话，向墓来做祭坛。曾子又话，杀牛来祭墓，孟子有讲，到东廓郊外地方来祭坟墓。又武王祭在毕国。这咁多只人，满下讲祭坟墓先行嘅说话。至到秦兴与西戎当时，该等人唔晓理义，就做倒寝庙，在坟墓侧边。因此汉朝，自高帝至宣帝，满下在坟墓侧边做寝庙，每日来献祭。蔡邕看倒祭坟墓咁盛行，佢就咁样话：吾听倒古时人，冇祭坟墓嘅礼。郑樵又话；三代以前，冇祭墓。在後有好多忠心嘅官府，与明白嘅读书人，有好多表章谏人唔好祭墓，爱除开祭墓嘅礼。可知祭墓，係唔合理。到唐开元二十年，以寒食节来祭墓，作为永久嘅礼仪。到宋朝就唔用寒食节，以清明节祭墓。自该当时到今下，以清明做祭墓嘅节。但係书传所记，虽然係祭墓，爱知这样礼，上古时代冇嘅。兼且成葬一祭，係迎精来转，在後唔再祭墓，而祭在庙。後长嘅人，每年上坟墓献祭，其係乜嘅道理呢？设使祖公嘅灵魂，如果在寝庙，或者可以来享献祭，坟墓中独独存到有骸骨，样边晓来享尔献祭呢？早时人既然错在先行，後代人又接紧其错处，传畀後代；早时人既然背逆道理，在後更过背逆道理，这係大略嘅查考。
客话卷二
第十七节 祭祖非孝
客问：做人子孙侪，设倒春天与秋天，两摆献祭，来表明子孙嘅孝心，实在报本追远嘅道理，时可以废开佢吗？
答话：曾子时常教人咁样话，“椎牛祭墓，不若鸡豚逮存。”意思係话，死後杀牛来献祭，唔当生前有鸡肉畀佢食。实在父母死後，係冇知觉，父母在生当时，爱尽自家本分来孝顺。但係今下该等人，父母在生当时，佢就薄待佢；父母死後，翻下转就厚待佢，汤等猪羊来献祭。吾等入教人，唔在乎咁样来献祭，做这等虚假嘅事。係爱父母在生当时，亲身服事其完身，又爱安慰其心，更过爱将主嘅道理，来劝谏佢，来救其灵魂。设若父母死当时，尽自家力量，买衣裳棺材，寻地方来埋葬佢。唔使信风水与地理先生，也唔狂有凶神恶杀，唔论乜嘅时候，都可以扫墓，也可以随时去修整坟墓。若使父母在生，有好行为，做子女侪，就爱照其好行为来做事，这就係武王周王尽孝顺嘅本分。设使父母冇好行为，做子女侪，就唔学其样，这係虞帝舜帝尽孝顺嘅本分，想传孝顺嘅道理。畀後代，就爱自家先行尽孝顺嘅本分，由宗族该等人，或亲或疏或朋友，都爱谦卑逊让，这就係尽自家嘅本分。时春秋二祭，设立神主牌，都可以话得孝心吗？
第十八节 不拜死人
客问：汝等入教人，唔设立神主牌，唔烧纸钱银宝。照汝等讲，实在有道理。但係父母死後，入开殓当时，做子女应当爱在侧边，来表明哀切嘅孝心，但係汝等入教嘅人，做乜嘅唔在侧边来拜死尸呢？
答话：父母死後，灵魂离开肉身，就到上帝面前爱受审判，或者赏，或者罚。该等死尸，係冇知觉，拜佢有乜嘅益呢？虽然跪到尔膝头腫开，佢也唔晓回答汝。若使尔父母在世当时，其灵魂在本身，佢係睡开，汝也必定唔拜佢。设使死後，灵魂离身，尸骸同木石噔，唔知唔觉，时好拜死尸吗？
第十九节 天堂地狱
客问：天堂地方，汝等信係万福嘅所在，来赏善人。地狱该里，係万祸嘅所在，来责罚恶人。但係四书五经中，唔曾有讲明这等事，汝等因乜嘅来信佢呢？
答话：现今世界，读书该等人，唔详细查考其文义，一开喙就话，唔曾讲明天堂地狱。殊不知，《诗经?大雅》篇有写倒咁样话：“文王在上，於昭于天。”意思即係话，文王虽然死开，其灵魂也在天堂。又话：“文王陟降，在帝左右。”意思係话，文王或者升高，或者打底，也在上帝天堂左右。又话：“世有哲王，三后在天。”意思係话，太王、王季、文王，满下在天堂。又《召诰》篇，有咁样写倒话：“天既遐终大邦殷之命，兹殷多先哲王在天。”意思係话，上帝既然远绝殷朝嘅命，今下殷朝，好多哲王在天堂。所以古书讲在上、在天、在帝左右、时唔係讲天堂吗？因上帝享受万福嘅位，本来冇名可以称得佢，故所以指天堂两只字称佢，表明安乐嘅意思。可见古时该等贤人，满下都知有天堂，畀善人做安乐嘅地方。咁样看起来，有天堂，就有地狱，畀恶人来受苦嘅所在。因为有赏，必定有罚，係自然嘅理，古书内称殷王文王，係有道嘅圣君；纣王桀王，係冇道嘅昏君。圣君在天堂，时昏君也在天堂吗？必定在地狱，唔使思疑啰。在狱者，係恶人灵魂与魔鬼，同受上帝刑罚嘅所在。本来冇名好喊，故所以借地狱两只字，表明受罚嘅意思。
第二十节 灵魂不灭
客问：人死後，如同灯火吹乌，样边讲，还有灵魂来受赏呢？
答话：人与禽兽来分别，就係因为人有灵魂。这係真神上帝畀倒嘅，唔单止有知觉行动，兼且晓分别善恶。灵魂在完身，好比人在屋噔，若係灵魂离开，其完身必定哙坏，但係其灵魂，永久都在。设若讲人死开，灵魂就灭，行善嘅人，有乜嘅益呢？行恶嘅人，有乜嘅害呢？係咁样就唔当行恶更过好。早时颜回行善，佢好短命；盗跖行恶，其命好长。若使係冇灵魂，有那侪肯学颜回嘅样呢？或者话，其名流芳百代。但係人死归土，纵使得倒极好嘅名声，也冇帮助生前嘅辛苦。兼且行善多受艰难，翻下转行恶得倒快乐，死又冇报应，时纵人行恶吗？故所以话，灵魂断唔灭得，然後天网冇的疏漏。世人唔知灵魂嘅报应，故所以行善，就望报在肉身；又望报在子孙。但係唔应验过多，所以阻隔其善心，佢就敢任意行恶，满下都係唔顾灵魂嘅过失。
第二十一节 神人鬼之别
客问：世间人时常有讲，人死就变鬼，鬼又可以变转人来，唔知係真唔？
答话：神、人、鬼三样，世间人好多唔明白，就来紊乱佢。因为天差与魔鬼，满下係冇形冇样。上帝唔曾造人以先，先造天差来服役，爱听上帝嘅命令，好比一国之中，该等朝臣一样。其中有只才能本事极广究，其名就喊做撤但，佢自家倚恃其才能本事，就生出骄傲嘅心，合就一党人，来忤逆上帝。在後上帝将这一党骄傲天差，预备责罚落地狱，受永远嘅苦，今下喊魔鬼该等就係啰。另外该待唔曾忤逆上帝，时常在上帝左右，永享天堂真福，今下称佢天差该等就係啰。上帝自责罚魔鬼以後，正造人类，如同上帝自家嘅像一样。男人名亚当，女人名夏娃，造成肉身，吹等生气畀佢，又赐灵魂添，使佢在这世间，虔心服事上帝，修德行善，然後正准佢到天堂，享永久嘅福，即係今下称人嘅灵魂就係啰。若使在世问背逆上帝，服事魔鬼，行凶作恶，死後必下地狱，与魔鬼同受永苦，唔可以再做人，这就係天差，人嘅灵魂，与魔鬼嘅来历，唔好閗多来紊乱佢。
第二十二节 真神许魔鬼在世
客问：魔鬼既然係害人，真神做乜嘅唔禁佢落地狱。前时看倒行邪术嘅人，做等极出奇嘅事，唔係魔鬼帮助佢来讲，人断冇本事来做，可见魔鬼在世间乘机会来诱惑人，係咁样做乜嘅唔禁止佢呢？
答话：魔鬼受罚嘅日期唔曾到，故所以上帝准佢暂时在世间，又在空中游行来试炼人。或者从邪从正，或者行善行恶，这係样边解呢？因为世间人，好多唔信鬼嘅，有时鬼藏人身，行出奇异嘅事。使人信鬼实在係有，尊佢敬佢，做其奴仆，任佢欺骗，既然知有鬼。必定知有神，故所以鬼可以使人寻究真神嘅来由，这係第一件。若係知天差逆命，变做邪鬼来受永远嘅刑，使人类唔敢逆命犯罪，知善恶有报应，这係第二件。好比炼善人嘅德，与火炼金噔，越炼越真，俗语有话，“家贫见孝子，世乱识忠臣。”世界冇魔鬼诱惑，样边见得出崇善，这係第三件。好比兵与贼来交战，打赢贼侪，应当得赏；若使与贼同党，顺服贼侪，应当责罚。魔鬼虽然想诱惑人犯罪，唔可以勉强人为恶，祸福係由人自家招倒。况且真神帮助人敌魔鬼，又特事畀福音真理，教导样边打赢魔鬼，故所以吾等，做上帝军兵，在生一世，务要打赢魔鬼，制胜自己嘅私欲，复礼来行仁爱，直行天堂嘅路，时时警醒祈祷，免至畀佢诱惑，翻下转，得得永生嘅福倒。
第二十三节 赏恶罚恶之公义
客问：真神既然係至公道、至仁义，有义必然赏，有恶必然罚。样边讲，世间嘅人行善侪，一世都受苦；恶人一世都享福，係咁样颠倒错乱，真神嘅公义在那呢？
答话：行善嘅人，必然受赏，行恶嘅人，必定受罚，这係一定嘅道理，唔使思疑。《书经》有讲：“惠迪吉，从逆凶，惟影响。”意思係话，顺善嘅人就吉，从逆嘅人就凶，好比影跟该只形样噔，如同响连紧声音一样。又话，“天道福善祸淫，作善降祥，作恶降殃。”意思係话，上帝用至公义嘅心来待人，设使行善嘅人，必然得福，行恶嘅人，必定得祸，这就係赏善罚恶嘅理，永久唔可以改换。爱知真神赏罚，唔係在人生前，係在人死後，用其公义审判。若使人心思说话行为，全完合真神主意，又唔曾犯诫命，正可以话得係真善；设使有一的唔合，也唔算係真善。因为人说话行为，至紧要爱尽善，又冇一的缺乏。今下世上该等人，时有全善嘅人吗？故所以好多事情，吾等作为善事，上帝翻下转看为恶事，因吾等独独看人外貌，唔识得人嘅内心，但係上帝就知。好比今下世间该等人，虽然其罪恶极大，或者有些须小善，也就当有小报，看世上嘅荣华富贵，算唔得係真福，因为唔可以久享，虽然享到一百岁，一死就冇。上帝因暂时嘅小善来赏佢，死後用地狱嘅永苦，责罚恶人嘅重罪，时唔係真神嘅公义吗？又今下世上嘅人，虽然至良善，也有些须小过，当爱受小小嘅责罚。当生前嘅灾难贫穷，唔得係重责罚，虽然受责罚到一百年，一死就冇。上帝因暂时嘅小苦，责罚善人嘅小过，死後用天堂嘅永福，报善人嘅功德，时唔係真神嘅公义吗？故所以恶人生前安乐，死後佢就受苦刑；善人生前贫穷，死後安乐享福。世间人唔明白赏罚嘅公义，唔知祸福嘅真假，閗多怨上帝唔公义。殊不知如同玉石噔，唔雕琢佢，唔成器皿。又好比人唔学，唔知理义。可见冇劳心，唔可修德；唔经过苦楚，唔可以成功。设使冇功冇德，想求天堂真福，像人唔学武艺，唔读诗书，就想得功名，时咁样可以求得倒吗？如同吾等，既然做耶稣门生侪，在这世界上，传扬主嘅道理，也好多摆受人咒骂，好多摆畀人拒逐，好多摆受人羞耻，好多摆畀人无辜受苦。独独时常忍耐，自细到老，都照主嘅道理来行，就可以得得天堂公义嘅报赏啰。
第二十四节 上帝不遽罚恶人
客问：恶人在世间，屡屡害善人，上帝既然係至公至义，做乜嘅唔灭开该等恶人，来代善人报雠呢？
答话：上帝虽然係至公至义，又至仁至慈，赏罚就用公义，拯救就用仁慈。上帝有好生嘅德，通世界人物各样，满下上帝所生，这就係仁慈嘅用心。人类嘅灵魂有赏罚，这也係上帝公义嘅心。但係上帝用仁慈待人，虽然有恶人，也宽待可怜佢，即係想佢悔罪改过，使其灵魂得救。殊不知这等恶人，唔晓改过行善，虽然有真道来教导，佢也唔肯信从，至到死唔晓改，上帝用公义心责罚佢。设使责罚在生前，狂怕损害善人。样边讲呢，因为好多做亚爸行恶，但係其孻子行善，若使灭开其爸，其孻子就哙成做孤子，冇好倚靠。又有等做孻子侪行恶，其爸就善良，若使灭开做孻子侪，其爸就哙冇人服事，来供养佢。也有好多做人丈夫侪行恶，但係其妇女良善，若使责罚灭开其丈夫，做妇女侪就成做寡妇，也十分可惜。好比掹稗，就哙损害禾苗；挑筋，就哙损害肉。故所以爱等禾苗与稗，同下生长，收谷入仓当时，将该等稗，正来烧开佢，可知上帝仁义两全，咁样看起来，人就爱快快醒悟，改恶行善，诚心服事上帝.倚靠救主，使自已灵魂得救就係啰。
第二十五节 贫富不可均
客问：上帝至公至义，做乜嘅唔将世上嘅财帛，均分畀世间人，使倒侪侪一样，冇穷富嘅分别，时係咁样唔好吗？
答话：上帝生人，有穷有富，正成世界。也使人修心行善，用穷富来报赏佢。若使佢当财主侪，其心仍然行恶，又骄傲人，欺骗善人，唔合道理嘅事，样样都去做，係咁样来讲，虽然佢财主，也哙变做穷人。若使佢係穷人，其心肝紧行善嘅念头，说话行为，极合道理，又悭俭勤力，冇事懒惰，係咁样来讲，虽然佢係穷人，也哙变财主。俗语有咁样讲，富贵轮流转，时有冇报应吗？因为上帝畀肉身吾等，也有耳朵眼珠手脚，又有心思知觉，有谋生嘅智慧。世界上也分别好多样人，或者读书人，或者耕田，或者做工，或者做生理，各侪做各侪嘅职业，也还有各样谋生嘅术艺，所争人做唔做唔止。设使上帝生人满下做财主佬，还有那侪去做工，有那侪去耕种。冇人做工，该等日用器具，从那里来；冇人耕种，该等米谷在那里来呢？係咁样，冇器具用，冇人耕种，满下人也哙变做禽兽啰。设使上帝生人□□满下贫穷，想做工侪，冇那里好做，也冇那里好赊借，世界人满下也好困苦凄凉。故所以上帝生人有穷有富，使倒互相帮助。财主侪得穷人嘅力，贫穷侪得财主人嘅钱财，一侪劳心，一侪劳力，两样唔可以缺，时好均分财帛畀人吗？况且上帝造人，如同瓦师傅造器具噔，有等粗，有等幼，有等大，有等小，各有各样使用。係咁样，时可以怨恨造倒唔同样吗？设使都有人怨恨，别侪就哙话佢冇见识。可见上帝造人，有穷有富，时可以怨恨上帝吗？咁样看起来，人生在世间，或者当顺境，或者当逆境，或者贫穷，或者财主，满下係上帝嘅主意。可知人爱听上□帝命令来行，时时关心道理，唔好忧愁贫穷，係咁样，可以入耶稣嘅教啰。
第二十六节 耶稣胜过圣贤
客问：耶稣係外国嘅圣贤吗？中国嘅圣贤係一样吗？
答话：耶稣两只字，即係救世嘅意。因为上帝赐独生子，下世间救人，故所以安其名耶稣，比圣贤更过尊贵。查考其才能、教门、功德，就可以知得。先行将其才能来查考下。在《圣经》有写倒：佢所行嘅灵迹，即係医病、逐鬼、喊死人翻生样事。耶稣一生，与真神嘅智慧见识一样。讲论圣贤人，虽然有出乎人类嘅知识，超脱人群嘅才能，到底都係做世上嘅人，其该智慧见识有限，还有好多紧要嘅道理，满下唔明白，故所以贤唔可以与耶稣比得。又将教门来谈论下。圣贤嘅教门，仅可教人修身、齐家、治国，三纲、五伦、五常、（修身嘅意思，即係洁己，或好或恶，时常爱小心行为。）（齐家嘅意思，即係行正伦常嘅道理，笃实恩爱仁义。）（治国嘅意思，即係自已行倒有德行模样，立倒有道德标准，畀人学样。）（三纲嘅意思，即係君臣、父子、夫妇因为君主侪，係做臣子嘅头脑；做亚爸侪，係孻子嘅头脑；做丈夫侪，係妇女人嘅头脑。）（五伦嘅意思，即係父子有亲、君臣有义、夫妇有别、长幼有序、朋友有信。）（五常嘅意思，即係仁、义、礼、智、信。）这咁多样，不过係处己待人。与及眼前嘅事，唔曾讲明服事真神；与来生嘅事，好比赎罪、复活、审判、永福、永祸，满下唔曾有讲，故所以唔得完全。因为圣贤所讲嘅理，耶稣既然讲明白；圣贤唔曾讲嘅理，耶稣满下也讲明。係咁样，圣贤唔可以与耶稣比得。又将功劳德行来比较下，讲论圣贤嘅功劳德行，不过係将其道理，教本国嘅人，佢自己亲身引带人行善，唔可以用其自家嘅身，救人脱罪，使人成圣洁，来救人嘅灵魂。但係耶稣用其道理，教通天下嘅人，唔单止亲身引人行道，更过牺牲其生命，赎人脱罪，使人灵魂得救；又行好多神迹异能，好比发出一句说话，使盲眼人看得倒、耳聋人听得倒、哑嘅晓讲说话，跛脚嘅哙行走、病侪即时平安、死嘅晓翻生、海浪也话得佢平静。这等奇事，圣贤做唔来，耶稣屡屡係咁样做。耶稣所行神迹，唔同他人行邪术，唔係在暗中来做，係在众人面前来行；唔係用法术来做，係用神嘅大权能来行；也唔係为名为利，唔係想人来惊狂出奇，佢係想人知，佢实在係救世人。可见耶稣尊贵过万国嘅圣贤吗？
第二十七节 耶稣的牺牲救赎
客问：耶稣既然係真神嘅孻子，做乜嘅被人钉死在十字架呢？
答话：为赎人脱罪，古今人，满下有罪，应当受真神责罚。有人想立其功劳来补其过失，就唔知恶多善少，正改开前日嘅罪愆，又有後日嘅过失。若使一世都尽本分，也无分外嘅馀功。好比欠人旧债，唔曾还，在後虽然有现银交易，唔欠分毫，也唔话得唔欠人嘅债。或者话，人有罪赦就赦，唔赦就罚，做乜嘅使耶稣代人赎罪呢？嗳哟！汝唔知真神係像人嘅君王，又如同人嘅亚爸噔，若使孻子有罪，即时就灭开佢，就失开做亚爸嘅恩情；子民犯罪，满下赦免佢，就失开做君王嘅公义。故所以耶稣赎人脱罪，係恩义两件全完。早时希腊国有只君王，佢责罚其太子咁样话，吾既然出里告示。犯我律法来行奸淫侪，就挖开其对眼珠，唔赦免其罪。今下汝既然犯倒这条律法，若使照正律法来定尔罪，吾又唔忍心；倘係徇情偏心来待汝，又样边来立法呢？汝自後如果悔罪改过，吾就自家挖一只眼来待汝，又出命挖太子一只眼珠添。太子感激其爸嘅恩爱，改过自新。到底佢也做君主，天亚爸待吾等，也係咁样。可惜吾等怕唔晓学这只太子嘅样，晓悔罪改过。另外有好多忠心嘅臣人，殉国难来死，後人也仰慕佢，何况耶稣殉万世万国嘅难。兼且自古以来，各国嘅人，满下用牺牲献祭，表明赎罪嘅意思。或者咁样话，牺牲係用佢来祀鬼神。殊不知汤王该时，有七年大旱天，佢就剪发断爪，用身做牺牲，时唔係代罪来求免人嘅灾难吗？可见汤王独救一国人嘅灾难，何况耶稣献身做罪祭，完赎罪嘅事，钉死在十字架上，係咁样，就係救万世万国嘅人，做赎人脱罪嘅祭啰。
第二十八节 信耶稣的凭据
客问：耶稣死开，在後三日翻生，这件事，唔知係实在唔？
答话：旧约书离耶稣千几年，或者几百年，先知师由真神默示，加先讲出救世主降生在那里地方，係乜嘅人子孙，又讲及佢在世被人害死，翻生上天，满下应验在耶稣身上，这係第一件信佢实在嘅。真神狂怕人唔明赎罪嘅理，使人历代献牛羊做赎罪祭嘅影，等到真赎罪嘅形样，来这世间以後，耶稣献其身做生活嘅祭，如同赎罪嘅羔羊噔，这係第二件信佢实在嘅。等到耶稣翻生上天，吩咐门徒传扬翻生嘅证据，门生就被人打骂害迫，设使唔係亲见确实，样边样还有咁坚心来做证呢？这係第三件信佢係实在嘅。犹太人因嫉妒来杀耶稣，门徒时常证佢有钉死救主嘅罪，到今下其国子孙，满天下都有，这係第四件信佢係实在嘅。新旧约两本书，记好多邻国交涉嘅事，今下查考邻国嘅史记，满下相同证据，这係第五件信佢係实在嘅。新旧约所记耶稣各样事迹，今下多人往犹太国，查考古迹，到今下还在，这係第六件信佢係实在嘅。西人踪迹遍天下，凡各国一事一物，也都留心查考，若使耶稣道理唔係真实，样边讲唔拣择别教，独係拣倒耶稣嘅教？这係第七件信佢係实在嘅。西国律法师，虽然极细微嘅事，佢也详细查察新旧两约圣书相隔千几年，经过几十人笔记，细查其书，满下相同，这係第八件信佢係实在嘅。当时门徒仅可一百二十人，满下係卑微嘅人，兼且遭好多害迫，唔係耶稣在天保护，样边传扬到通天大下？这係第九件信佢係实在嘅，今日奉教嘅人，满下尊重圣教，无一的可以嫌弃，还狂怕人力唔够，唔晓坚心守稳，又教其子孙爱入圣教，这係第十件信佢实在嘅。泰西各国信耶稣之後，满下日见日进步，可知其教化有能力。这咁多不过大略述出，还有好多事迹，载在新约书做凭据，人人可以共下信佢嘅。
第二十九节 领洗礼的意义
客问：信耶稣教道理就够啰，样边讲又爱领洗礼正可以入教呢？
答话：罪人悔改，必定爱尊耶稣嘅命领洗礼，表明做耶稣嘅门徒。如同叛逆嘅子民噔，必定尊律法改装，认做皇帝子民。故所以耶稣佢有话，信佢来领洗礼侪，就得救；唔信侪，将来定罪。受洗嘅意思，表明与耶稣同生同死，共下成做一会，非係结党，唔係为名为利，竟係为自家嘅灵魂，广传耶稣嘅道理，耶稣吩咐人入教，其意思十分广阔，不过大约来讲下：一则加增人嘅知识。因为人像细子噔，无乜嘅见识，最容易受人诱惑，若使既然身入教会，就有牧师先生，用圣经来教导，加增尔智慧，就可以免脱诱惑。二则坚固人嘅信德。人虽然悔改信主，但係信心容易冷淡，身入教会，有牧师劝慰，有教友警醒，互相勉砺，如同人嘅完身噔，联络帮助，正可以坚固。三则立神国在地上。人唔曾除净恶性，身虽然想升天心也唔安乐，必定先行在教会学习天理，守紧真神诫命，存紧圣洁嘅念头，然後可以安享天福；又赐代主行权，接人入圣会。会内有唔照主嘅道来行，就爱革佢出圣会。爱使佢行所当行，做所当做，与世俗爱有分别，来做世间嘅光。四则合心力传道。圣徒得救，又爱救人。但係一只人才能智慧唔够，帮助嘅力有恨。身入教会，就合众人嘅力量，传扬福音。故所以话信耶稣侪，必定爱领洗礼来入教啰。
第三十节 女人亦入教
客问：男人从教就可以够做乜嘅，女人都爱来入教呢？
答话：若係邪教唔论男女应当爱闪避；其係正教唔论男女必定爱从。既然知耶稣教係正教，男人可以从，独独女人唔可以从吗？时上帝赐口粮，男人可以用佢来养生，女人就该当饿死吗？兼且自古时以来，满下都有死，设使人冇教育就与禽兽噔。女人也係人类，时独独女人唔使受教育吗？吾等传教嘅人，体贴上帝嘅公义，遵从耶稣嘅教训，传畀世间嘅男女。但係有等唔曾入教嘅人，唔知正教十分严重，还有等好色嘅人，翻下转思疑男女混杂。殊不知我等教中人，满下服事真神为根本，以救灵魂为紧要。教会一切教训与十诫，满下係救主所传授嘅，尽善尽美，天理人情，至正道理，男女应当行嘅本分。况且淫邪係圣教十诫所严禁，教中嘅人，满下爱遵守十诫，若有犯诫就即时革出圣会，死後落地狱，受永久责罚。世俗人冇知识，用行淫毁谤正教，殊不知教友各侪，营谋自家业艺，各侪转各侪屋家住宿。不过公设一间，礼拜堂七日一摆聚集同心共拜真神，静心听牧师讲道理，男女有分别，众目共见，仅可聚集三四点钟，就各侪转屋家，係光明正大嘅举动，那里有淫邪嘅事呢？今下教外嘅人在戏园看戏，男女共下来坐，入庙堂烧香男女混杂，係咁样都唔亵渎，反下转亵渎正教。因有淫心嘅人，就疑狐人也有淫心。殊不知教士以神为重，以人为轻，心正去百邪，唔怕人亵渎，唔避人嫌，想得真神欢喜，使道理有益畀人就係啰。
第三十一节 教中之诫
客问：入教人应当守乜嘅诫呢？
答话：爱守上帝十条诫。第一诫，真神以外，唔好有别二样嘅神。後二诫，唔好雕刻偶像，天上地下海中百物，也唔好拜。第三诫，唔好閗多亵渎真神嘅名。第四诫，爱守安息日，当该日，唔好做各样工夫。第五诫，爱孝敬父母。第六诫，唔好杀人。第七诫，唔好行奸淫。第八诫，唔好偷人嘅。第九诫，唔好讲假话。第十诫，唔好贪人嘅物。另外领洗礼食圣餐，係耶稣立倒嘅，也应当守佢。
第三十二节 假信徒
客问：真神十诫，实在至善。但係看倒入教嘅人，守十诫好少，犯十诫较多，也有好多无所不为，比吾等教外嘅人，更过行恶。若使称这等係圣教中人，天下人，满下可以话得佢係圣洁啰。
答话：今下吾等不过论教嘅邪正、道嘅真假，唔係分论入教人善与唔善。因圣教嘅宗旨，係行仁爱，讲理义，改恶从善。所讲嘅说话，所行嘅事，爱端正合规矩。除开世俗嘅恶欲，必定爱恶心灭绝善念发生，遵照主道来行，使倒灵魂得救就着啰。殊不知有等假善嘅人，背圣教，离道理，存竟恶欲念头，任意行事，係咁样，算唔得係圣教中人。好比朝廷设倒律法，惩治子民，除开行恶嘅人民，安置善良嘅百姓。谁不知，还有不肖嘅子弟，唔狂律法，谋财害命，奸拐偷盗，做样样嘅恶事。可见国家嘅律法，係使佢咁样行为唔。故所以爱看教嘅邪正，人行善与唔行善，唔可以将佢来比较。汝等讲教内嘅人，比教外人更过行恶，时唔係十分亵渎吗？
第三十三节 耶稣教非外国的教
客问：耶稣教虽然係真，但係外国嘅教，可以唔使从佢。
答话：黄金唔使拣择地方，独係精就贵重；道理唔论方向，独係真就爱尊崇，正係天下万民嘅道。好比孔子、孟子生在邹国、鲁国，但係其道传到齐晋两国。又舜帝係东夷人，文王係西夷人，中国满下尊佢做圣人。佛氏嘅邪教自天竺传来，係灭伦败俗嘅毒，汝等满下也敬拜佢。吾等圣教嘅道，有根有源，句句真实，可以引带人生前行善，身後得救，来享永久嘅福。汝翻下转作佢係閒事，唔肯信从佢，时唔係使人可惜吗？兼且耶稣圣教，出自东方，传到西国，各国圣人嘅教，虽然有可取，但係各执己见，粘紧世俗嘅遗传，不过像灯烛嘅光，仅可照自己国中。天国嘅道，如同太阳噔，天下万国都照得倒，唔可以话得係外国嘅教啰。
第三十四节 不可拜假神
客问：真神如同皇上，众神好比百官，拜真神也应当兼拜众神唔。
答话：真神係无所不知、无所不能，唔像人主治国噔，爱用官员来帮助。天上虽然有天使，不过真神所造，听命令指挥，唔受人拜跪。若使世俗所设立嘅假神，更过唔係真神嘅官，係做真神嘅敌。样边解呢？好比世界皇上嘅钦差，必定先行自家尊崇其君主，又爱教子民，守君主法律。设使有一只官员，自家唔尊崇其君主，又唔教子民守法律，翻下转教子民尊自家与皇上一样，时唔係叛逆嘅官员吗？查庙中所立嘅假神，自家唔恭敬真神，又唔教子民恭敬真神，翻下转诱惑人恭敬自家，使人祈福求佑在自家。係咁样，时唔係叛逆吗？既然知假神係叛逆嘅贼，可以敬佢吗，可以弃绝佢吗？若使人敬假神，逆真神，就好比百姓叛王从贼一样。等到世界末日当时，真神责罚假神，也都责罚拜假神嘅人。故所以魔鬼唔遵神命，切勿拜佢，爱弃绝佢，正可以做得。
第三十五节 大意论拜神嘅法
客问：想拜真神，唔知样边正可以拜得？
答话：拜真神唔使设立庙堂，唔使雕刻偶像，因为神係无所不在；唔用三牲果品元宝香烛样事，因为神係至富有嘅，因为神唔居住人手所造嘅屋，天做其座位，地做踏脚凳；唔用人所用嘅物，佢係畀万样嘅物件。吾等大家独係想人嘅心诚实来拜真神，每日临食饭嘅时，应当祈祷，多谢养育嘅恩，求神祝福所食壮健身体，晓行本分嘅事；或者自家在至静至密嘅屋诚心祈祷；或者与一家人每日早晚聚集，大小唱诗或读几节圣经书，一只人出声祈祷，众心默和，就係拜神。每逢礼拜日，入教堂与众人聚集，牧师讲圣书、教导、警醒、劝诫、安慰、唱诗、祈祷，这係拜神大略嘅形式啰。
第三十六节 论异端
客问：真神应当敬拜，但係世俗通行嘅事，如同看风水、拣日、算命、占卦、看相、求签，也冇犯法，做乜嘅咸人唔好咁样行为呢？
答话：邪与正唔以并立，好比杨朱与墨翟嘅教，若使唔弃绝佢，孔子与孟子嘅道就唔行。设使唔弃绝邪教异端，正道就唔兴。如紫色夺开朱色，用鱼眼珠紊乱珍珠一样，就唔纯净，邪能宽正，正唔可以容邪。故所以查察明白，正唔怕畀异端来诱惑，就十分好彩啰。
第三十七节 大意讲论靠风水生祸
客问：世人建造房屋，安葬先人嘅地坟，满下也爱倚靠风水来得福，係唔係呢？
答话：样边喊做风係东西南北嘅风；样边喊做水，江湖河海该等水。古人做屋葬地拣择地方，唔係因为子孙贫富得福嘅计。大约做屋不过看地方高低，水路远近，风势大小。若地基过低，必定受水浸；水路十分远，用水就艰难；风势猛烈，狂怕吹崩屋；若係冇风，人就容易生病；这就係正经嘅风水。若使讲葬地坟，就爱拣高山燥爽，藏风避水。地方燥，棺木冇咁容易烂；藏风草木冇事损伤，避水，坟墓唔怕畀水冲崩，子孙免开挂心；这就係葬地坟，正经风水啰。可惜世间人好奇怪，听地理先生嘅说话，閗多信子孙有兴衰，与屋场地坟风水有关涉。殊不知有等愚蠢嘅人，妄用钱银来寻山坟，其家财渐渐用尽就变做穷人。或者因为祠堂，或者因为地坟，起造当时，两造械斗，同室操戈，杀死子弟，打官司，倾家败业，种种恶习生了好多祸患。谁不知，作善降祥，作恶降灾殃；死生有命定，富贵在乎上帝安排，兼且上古有祠堂，无葬地坟。孟子都有讲，古时人父母死，安置在山坑旷野，唔择龙穴方向，地理如果有应验，古人就哙冇後代啰，样边讲古人子孙更过多呢？今世嘅人，满下係古人嘅後代，可知信风水来得福，係后代人假话。查考地理邪术起头，在晋朝有只喊做郭所说，在後佢自家也被墙□死。後来有只杨筠松，做《撼龙经》。又曾文迪，做《青囊序》。这两只人，其子孙也唔兴旺。虽然精通地理嘅邪术，翻下转遭祸患。俗话都有讲，算命先生半路亡，地理先生冇屋场。兼且夏商周三代当时，堪舆唔曾出，富贵还胜过今日。西国诸邦，唔信堪舆龙穴方向，富贵甲於天下，可知福贵由天就明白啰。中国因迷信风水，禁止开矿，本来係富有嘅国，反转贫穷。自锁银櫃，甘受饥寒，都唔醒悟。好比四书有讲，无使土亲肤，亲死安葬，係做人子女侪至好嘅方法。至紧要，唔好停柩来寻地坟，搬来移去，来望发达。甚至到有等将父母该尸骸装落棺材肚里去，在屋家停三两年也有，停十年几载也有，以为係出奇嘅货物噔，等有好价钱来卖，做乜嘅有咁残忍嘅心呢？故所以吕才、司马温公、逍汸，这等贤人，出力来辩驳，信风水係假，想烧其书，灭开其说话。可知唔好信地理先生，来畀佢欺骗，倚靠风水，就得福，实係会生祸。好比俗语有话：“地理先生惯说空，指南指北指西东。此穴若果公侯地，何不留来葬乃翁。”将这几句俗话来想下子，就知得风水唔可以使人得福啰。
客话卷三
第三十八节 讲论择日与拣方向嘅假处
查考周成王当时，有只越裳氏来朝，在後转嘅时，唔记得转嘅路，在乜嘅方向，周公就将黄帝出战用嘅、喊做征车，照其上下样来做指南车。畀佢，雕刻一只木人，举手指南，使佢在面前带路。今下罗经嘅枚针，也係照指南车做倒嘅。但係甲子係黄帝吩咐大挠所做，前时唔曾有年月日时纪念，每年看倒花开花谢，就正知春天与秋天。大挠就占斗柄初昏所指，用甲乙丙丁戊己庚辛壬癸为天干，子丑寅卯辰己午未申酉戍亥为地支，相配成做甲子。查考其原意，造南针，係定行路嘅方向；造甲子，做纪念年月嘅变换；唔係因为做屋葬地来设倒嘅。古时人兴工，唔拣日，冇寻方向，唔曾听倒有冲犯三煞。今下泰西各只国，有咁样嘅陋习冇，佢做各样事，更过顺适利便。现今世俗，该等人，畀张天师诱惑，每摆做一件小事，都爱拣时择日。或者同时嫁娶，同日开张做生理，结局多有唔同。有等在该时係生日，有等在该时係死日，也冇吉凶嘅分别。好比武王用甲子日兴旺，纣王用甲子日衰亡。二王同日交战，有胜有败，因为吉凶嘅权，在天上独一活神畀倒嘅。从逆就凶，惠迪就吉，祸福冇门，为人自家招倒嘅，与大挠所造嘅甲子，黄帝所造指南车，有乜嘅关涉呢？
第三十九节 讲论算嘅假
算命嘅法术。先行在战国当时，有只鬼谷子，其名喊做王诩，妄谈五行生克，定人祸福，以年月日时，分配天干地支，好比金木水火土，閗多讲相生相克，推算人年岁，或长命，或短命，来欺骗愚蠢嘅人。做乜嘅唔思想下子，每一只时辰，生育人类，计唔出咁多，也有做王做帝，也有公侯将相，有等富贵，有等贫贱，有等命长，有等命短，唔得一律过。虽然双生嘅孻子，所当倒嘅光景，也有分别。孔子有话，生死富贵在天，唔曾话在乎八字。好比做人亚爸侪，唔顾其等孻子嘅顺逆，先行係爱这只打该只係吗？时唔係顺侪就爱佢，逆侪就恼佢吗？何况天上至公义嘅神，更过安排定着。可见算命有乜嘅益呢？兼且今下学算命该等人，好多係眼珠盲嘅，或者係江湖子弟，不过係用这等邪术，来骗人嘅钱财就係咯。
第四十节 讲论看相嘅假处
真神上帝，造人五脏六腑，筋骨皮毛，四肢百骸。自天子至到人民，大抵同样。多少分别嘅，不过肥瘦黑白唔止。穷侪食稀粥菜汤，居信该等屋，唔係十分几好；富人所食嘅，朝鱼晚肉，所住嘅高楼大屋，自然气色唔同。试看下穷富、安乐、辛苦、壮健、薄弱，实在难知後来光景样边结局。有人先瘦後肥，先肥後瘦，先富後穷，先穷後富，更过难加先知定。又有面貌相似。如同舜帝噔其眼珠有重瞳，项羽眼珠也係重瞳，因为乜嘅缘故，一只仁慈，一侪凶恶呢？又阳虎其相貌与孔子一样，做乜嘅一只係圣人，一只係奸人呢？孔子话：“以貌取仁，失之子羽。”今下人做乜嘅唔信孔子话，反下转信人欺骗来看相呢？但係看你嘅法，不过看佢或者聪明，或者愚蠢，或者其性情狠恶，或者驯静，查察其说话行为，大略知多少唔止。如同医生看病人嘅外形，大概知其病寒热轻重。殊不知术士看人嘅眉额耳鼻，就判断终身吉凶，正係欺骗人嘅说话。吾等爱知吉凶祸福，在乎真神上帝安排。
第四十一节 讲论占卦求签测字嘅假法
卜卦求签测字，与拈阄掷骰冇分别。或者应验与唔应验，满下也冇定着。时常看倒测吉，又变做凶；卜倒凶，又翻转吉。有成下子凑着应验，就话有灵；若使唔应验，就唔敢声。做乜嘅唔想下子，测字卜卦，有成百摆咁多，也怕有一两摆应验。好比一只人，唔曾习练过射箭，日日都去射，必定有几摆射中；唔係实在射中，不过忽然间射中唔止，术士用周公书“卜世三十代，卜年八百。”证卜有灵，做乜嘅唔看下书经《召诰》篇有咁样写倒：“惟此历年，我不敢知。”这两句说话，係借夏商两代嘅光景，来警戒成王卜卦冇应验。可见同朝嘅召公，都唔用周公嘅卦爻做凭据。又周朝七百年当时，孟子有话：“数则过矣。”孟子时唔知周公嘅卜卦吗？又古文有写倒只人，其名喊屈原，佢去求卜卦，在後詹尹回答佢咁样话：“夫尺有所短，寸有所长。物有所不足，智有所不明，数有所不逮，神有所不通。用君之心，行君之道，龟荚不能知此事。”这咁多句说话嘅意思，凡营谋一件事，或做一件物业，唔可以加先明白断定。咁样看起来，可知古人，早也知得占卦係冇用。求签也係一样，向菩萨面前求签，或者应验与唔应验，係忽然间嘅事，唔係菩萨可以使得倒。信求签侪，唔单止冇益，兼且有损害添。测字嘅术士，好多係贫穷人，佢若使可以为他人谋利，时佢自家唔可以谋得钱财吗？吾等有时与佢辩论，至到冇说话回答，佢自己就话，吾也知係骗人，无奈家穷不得已藉这等来度日，！咁样，就可以知占卦求签测字，确实係假，唔使思疑啰。
第四十二节 讲论菩萨满下係假
客问：耶稣教，理应信崇。但係我中国所拜该等菩萨，多由帝王所封，其中时冇一两只係神吗？汝等一概弃绝佢，係乜嘅缘故呢？
答话：中国自释教与道教渐渐兴，拜菩萨嘅风俗就盛行，千奇万怪，各处地方，有各样嘅神，讲唔尽咁多。共总来讲，不过二样。第一样，指生成嘅物件为神，好比有等拜天地日朋星辰。殊不知真神造天地，係畀人居住；造日月星辰，来光照世间人；造万物来养育人，如同亚爸预备产业屋舍灯火，与各样物件，保养子女一样。设使子女唔敬亚爸，反下转敬屋舍灯火，咁样做得吗？吾等知天地中，有一位大主宰，每日受其恩赐，理当多谢，唔好敬天地做神。第二样，指死後嘅人为神，如同敬玉皇、老君、真武、文昌、关羽、城隍、土地、社稷、真君、晏公、天后、张天师、神仙、双忠、三山、佛爷、观音、阎王，与各样杂神。大约这等係通国所敬拜，另有各处所拜，唔知几多。独係将这等通行敬拜嘅，辨其来历出处，自然知虚假哙弃绝佢啰。
第四十三节 讲论帝王有封神嘅权
客问：紊乱拜神，当然唔好，但係经帝王封过该等神，时唔好拜吗？
答话：帝王冇封神嘅权。或者讲玉皇所封玉皇，係汉朝尾嘅人，到宋朝徽宗政和六年，正封玉皇为天上上帝。玉皇既然受人封，佢样边有本事封别人呢？况且帝王有能为封神，佢係人类，不过有权封本国人做官，管理本国，冇权封外国人做官，来管外国，样边佢还有本事封死人为神，管理天地呢？若使有本事封死人为神，不必封别人，独独封自己祖公，做一只大神，保佑子孙永世做帝王，时係咁样唔好吗？样边讲自夏朝到今下，换开二十几朝，封神嘅事，唔单止明白嘅人知其係假，就係有多少智慧嘅人，也都唔肯信。不过藉咁样使生人忠节，使到人唔敢生出别二样心就係啰。
第四十四节 讲论玉皇
查考宋史，玉皇生在汉朝尾，姓张，其名喊做亚仪，真定府行唐县人。自细当时，学习老君教，避世在武当山，采药炼丹，医治病人。到宋朝徽宗皇帝当时，有只术士林灵，平素也係学习老君嘅教，诱惑皇上。徽宗被佢迷惑，封张仪做玉皇上帝，写符念咒，出命令被子民知，尊张仪为神，其意思係想佢保护国家长久。谁不知封张仪之後，冇几久，徽宗父子妻妾满下被金人捉去，受羞辱，讲唔出咁凄凉，死在五国城。徽宗敬玉皇至诚心，丧国家，身遭死亡，玉皇冇本事去救。今下拜玉皇侪，做乜嘅唔将徽宗皇帝来做鉴戒呢？
第四十五节 讲论老君或称老聃
查考《纲鉴》，老君生在周尾，春秋当时，其职分做史官，姓李，名耳。因佢年老，当时人称其名老子。早时孔夫子在周敬王当时，周流天下，时常与老聃往来，跟问其礼仪。在後有等好事嘅人，做本老君嘅小传，閗多讲佢生在殷朝武丁嘅时，怀胎八十二年，破其肚胈，右片□□骨，正生出世来，头颅毛与须，满下也白，故所以称佢係老子，又称佢元始上帝。到唐朝高宗王当时，又加号玄元皇帝。又到真宗当时，复加号太上老君。可惜今下人，唔晓查察，明知佢生在天地之间，翻下转称佢元始天尊，设倒老君庙来敬拜佢。独韩文公知佢係假，话该等係邪说，比老子做坐井观天，见识细小，道理唔正，想烧开其书，用先王嘅道来教佢。爱查考古文侪，就可以明白啰。
第四十六节 讲论真武
查考真武，湖广湘阳县人，姓刘名长生，自细归隐在武当山太和庵。有一日清早晨出门，天气黑暗，有危险地方，都看唔倒，失脚跌落深坑去，散发破肠来死。其嘅门徒假说师傅升天，欺骗众人。有等愚蠢嘅人，被佢诱惑，一傅百，百传千。到明朝永乐君封佢做镇天真武大将军，望佢保佑万代天下太平。殊不知，崇祯係永乐君王後代嘅子孙，忽然间被李闯害迫，在煤山自尽来死。真武当时，唔知去保护来救佢，可见世人容易受人欺骗，听人称佢係神，就去崇拜佢，自细到老都唔晓醒悟，真係令人可惜啰。吾等爱知认识造天地嘅主，诚心服事，就唔被世俗来诱惑，唔怕走落魔鬼黑暗嘅路途，行转正大光明嘅道就着啰。
第四十七节 讲论文昌
文昌姓陈，名子春，係宋朝嘅状元。到元朝仁宗三年，封佢做文昌帝君，意思係表明其才学最高。殊不知，後来该等读书人，妄想功名，称佢做司禄嘅神，佢有主权保佑人得功名，立倒文昌庙来敬拜佢，望佢保佑入学中举。做乜嘅唔查考宋朝以前，唔曾有子春当时，也有人考功名，该当时，又有那侪做司禄管理功名呢？好比有一只，其屋家贫穷，佢又唔勤力读书，又唔明白文义，徒然去拜文昌，时咁样都可以入学中举吗？设使勤力读书，又极有才学，自然国家凭文取士，自古到今也係咁样。故所以四书有讲：“君子求诸己。”唔曾话读书人爱求文昌。可见文昌，唔可以保佑人得功名就明白啰。
第四十八节 讲论关公
关公本来係姓施，其名安做寿昌，山西蒲州解梁人也。後来改姓关，其名喊做亚羽，别字云长，係後汉昭烈皇帝嘅武将。不过称佢後汉嘅忠臣唔可以称佢做护国嘅神。孔明当日，托佢守荆州，在後佢也失开荆州地方。可知生前冇本事保护汉朝，临死又冇本事保守自家尸骸，死後佢样边有能为保佑别人呢？有等好事嘅人，做明圣经，假托关公嘅名，话关公掌守天门，有主权使人或祸或福。殊不知刘备、张飞满下为关公报仇来死，佢冇能为显圣保佑；阿斗捧印出降，佢也冇本事显圣复国。今下人话关公显圣，护国庇民，做乜嘅听人诱惑咁甚呢？或者话失国家，兄弟并死，这等係天数。既然知天数，就应当敬拜定数嘅上帝，与关公有乜嘅关涉呢？关公在生忠义，人应该学其忠义，唔可以望佢保佑。今下人将三牲、果品、纸钱、香烛、想佢保佑，谁不知曹操当日待关公，上马题金，下马题银，三日一小宴，五日一大宴，佢尚且唔受其嘅；何况今下人，奉一的微礼，时可以得佢保佑吗？不过传其名畀人效法，唔係保佑人。
第四十九节 讲论城隍
查考城隍两只字嘅意思，係城外濠沟名，俗话喊护城河。又话有水嘅，就喊沟，冇水嘅；就喊隍，唔係人名。查考其历史原因，晋朝有只司马炎帝，看倒各府官员唔忠心，治理子民又冇仁爱，就将汉高祖一只忠臣灌婴嘅像画竟在木牌顶高，安置佢在赞德厅，其意思，使各官员看倒佢，来效法其忠心，行其仁爱。殊不知畀在後嘅人，假称係守城嘅神，改其名喊做城隍。因咁样，各州府县，做倒城隍庙该等官员，初壹十五，满下都去烧香，望佢保国安民。做乜嘅唔想下子，佢在生当时，佢冇能为免脱死亡；既然死开，又那还有本事来保佑人呢？又閗多讲，城隍三年一任，假说某人死开，就去做城隍，十分係好奇怪。一只人传虚，众人就听，真係使人好笑，又使人可惜啰。
第五十节 讲论土地
查考左传，社为土地嘅主，封土公，称土神。後代拜社，做土地伯公。查考社字，係平水土嘅官衔，有能为管理后土，其名即係句龙，古书有讲，句龙在颛顼皇帝当时，佢做管理后土嘅职份，做平水土嘅官员，督理开水路，平水有功劳，如同今下督理开河嘅官一样。人死也哙离开生前嘅职份，时永久都係管理后土嘅主吗？今下人唔去查考，因自己好利，塑泥像，其手揸团金，装成老人相貌，就称佢土地伯公。又话每年三月廿九，係土地诞，搭棚做戏来敬拜佢。又有等在各田头，设倒土地伯公来跪拜，作为咁样，报其功劳。殊不知土产万物，係由造化主恩赐，唔报恩土，反下转报土嘅功劳，如同得亚爸产业，叩头在田地，係咁样合唔合呢？
第五十一节 讲论社稷
查察社嘅意思，係平水土嘅官，稷係教子民耕种嘅官。今下世间人，将社稷两只字，共做一句来讲。查考稷嘅来历，係黄帝嘅孙，文王十代嘅祖公，其名喊做亚弃，才学十分广究，看地方高低燥湿，种植蔬菜，又极哙耕种五谷。在尧舜嘅当时，做农稷嘅官职教子民耕田，自该时子民，正得倒衣食，故所以人称其名后稷。佢教子民耕种，本来係有益畀人。但係佢冇能为，使倒年成丰熟，好事嘅人。称佢做五谷神，求佢保佑田园茂盛，五谷丰登。这等人，满下唔识生物养人嘅活神，来拜先代嘅人为神。殊不知后稷係上帝所生，畀等智慧佢，来教子民。书中有话：“郊社嘅礼，所以祀上帝也。”唔曾讲祀后稷，郊坛圆祀郊，係报答上帝造天嘅功劳；社坛方，祀社，报答上帝造地嘅功劳。上帝管风雨、田园、菜蔬、五谷、样事、係天地人物嘅大主宰。
第五十二节 讲论真君
真君姓许，名逊，其号安做敬之，係江西南昌府生米乡，後汉三国当时嘅人。这只人极忠厚，做过旌阳县官，治理子民极有仁爱，好习练老君嘅教，施药炼丹，死後葬在许家庄。後来遇着江西大水，冲崩民间屋舍，假作谣言，孽龙作乱，若使唔係许逊擒住，江西就哙变做湖啰。许逊门边有一只大潭，该等水周长年冇乾，侧边有一樖铁色嘅树。就係话，该樖树与该只大潭，做祭孽龙嘅地方。又话许逊一家人，男妇老少鸡狗，白日升天。传等假话，诱惑好多人。至到宋朝徽宗皇帝，也习练老君道教，封许逊做神功妙济真君，赐倒一只匾额，写“竟王隆万寿”，故所以今下称其嘅庙堂，话万寿宫。又称做江西福神，男女都去敬拜，望佢保佑。宋徽宗封好多道教人为神，到亡国当时，冇一只神来救佢。这只许逊既然冇能为救其恩人，佢样边还救得别人呢？今下拜许真君侪，做乜嘅唔晓醒悟弃绝佢，来服事真神呢？
第五十三节 讲论宴公
宴公係江西临江府人，名戊子，宋朝时代人。既然中开进士，奉命出海，一往一来，唔曾遭倒有危险，因咁样有功劳，封佢做侯爵。至仁宗当时，辞职做子民，在後得病死开。今下人想倒佢在生忠厚，走海冇失误，作为宴公能保水道，故所以有好多冇知识嘅船户拜佢为神。殊不知行船嘅人，若使入新港口，或遇急滩，必爱请本土人，习惯水路嘅做稍公，揸舵来带水路，或使晓行水路嘅人唔曾到，船就唔敢行。可知所倚靠係在乎人，唔在乎晏公。今下做乜嘅咁愚蠢，唔晓醒悟呢？
第五十四节 讲论天后
天后係福建，兴化府，蒲田县，林氏女，名甜。其爸与其哥，打鱼为业艺，佢十八岁当时，在屋家纺织，有一日吹好大风，这只甜在眠床睡开。
在梦中讲狂话，其在侧边喊醒佢。这只甜就话，吾梦中在海面救我哥与老娣，吾用喙啣我哥，用手捉紧我老娣，因为母亲喊吾，吾下开喙，我哥就浸死开。係咁样与佢共围村住嘅人，就造谣言话，这只甜女，得倒道，有能为救海面风浪所害嘅人。到宋朝当时，封佢做灵应夫人，又至明朝永乐君封佢做天后圣母行水面。该等人，欢喜立倒天后像，在船望佢保佑，水路平安，各处也做天后庙来拜佢。谁不知每年海面沉船丧命，唔知几多，天后做乜嘅唔去救佢呢？竟係听倒死生有命，上帝主宰，能管风雨祸福；唔曾听倒敬天后，得倒保佑。可惜世间唔晓醒悟。
第五十五节 讲论张天师
查考鉴史，天师嘅祖公，係张道陵，习练老君教，炼丹画符，建醮酬神，驱邪捉鬼，当时极少人信。到唐明皇当时，有只张虚靖，用妖术骗明皇，有本事使人长命，明皇被佢迷惑，封佢做天师。但係明皇不过七十零岁就死，样边见得佢长命呢？到宋朝当时，有只张强耀，巧言诱惑，皇上徽宗就赐佢世袭，因咁样历代称做张天师。後代该等君王，唔查考其假处，依旧准佢，徒然食国家嘅俸禄，冇的益处畀国家与子民。若係讲其符头十分灵，徽宗败亡嘅日，佢冇本事画符来救，係咁样就係背恩。兼且又冇法来赶鬼，不过听倒其假名声，唔曾看倒佢行出实事来。天师嘅名，因佢学习星学，料理历数，前代用佢，有功受禄。自明到今，满下用西洋历数，张天係空存职位，佢出等符法行世，也係迷惑子民。天师唔倚靠上帝，样边晓赶鬼呢？
第五十六节 讲论神仙
自从开天地以来，有生就有死，係一定嘅理，独係有等贪生怕死嘅人，閗多求长生不老嘅术，误信老君道家嘅说，坐上运气，修药炼丹，但係佢到底也哙死，秦始皇、汉武帝，满下求长生不老嘅术，到底也冇应验。可惜有等好事嘅人，假造仙家小传，将富贵贫贱，男女老少八只字，装做八只人该名，称佢係八仙，弄假成真，就喊汉钟离、吕洞宾、张果老、曹国舅、篮采和、李铁拐、韩湘子、何仙姑，共竟为八仙。查考书中所载，这八只人，生在唐朝当时，有生有死，样边称得係八仙呢？汉武帝被术士诱惑，佢临死当时，就醒悟话：天下样边有仙人，满下也係妖魔邪怪，唔止，这就係阅历嘅说话，可见好仙嘅人，到底佢也知係冇仙人啰。
第五十七节 讲论双忠
查考纲目，知双忠係两只人，一只係张巡，一只係许远，为睢阳太守。张巡做真源令，当时有只安禄山作乱，张巡起兵讨贼，极有能为，又爱其手下嘅士卒，故所以屡摆打败贼人。在後贼人，使尹子奇围困睢阳，张巡带兵入睢阳与远合做一营兵，与安禄山作乱贼日夜苦战，杀贼人好多，殊不知粮饷用尽，瞧阳城就失开。张巡与许远，被贼人捉倒，这两只人，虽然受苦死，佢也唔归服贼人。在後做史记侪，评论这两只人，尽忠完节，满下係天命。今下人唔学佢两侪嘅忠义，徒然用香烛来拜佢，係咁样有乜嘅益呢？
第五十八节 讲论三山
查考三山，係三只山名，一只係巾山，一只係明山，一只係独山。相传宋朝当时，有只帝昞，被元兵追迫到三山地方，有三只人，手揸利器，打退元兵。在後问这三只人嘅姓名，但係佢话，我三侪係兄弟，居信在前面山中，讲妥以後，该三只人就走开。在後去寻佢寻唔倒，冇的踪迹，因为咁样就造谣言话，这三只人，係三山嘅神，加封到三山国王，可见这等事，如同摹风捉影一样。在後帝昞又兵败，又走到零丁洋来死，又唔见这三只人再来打救，佢就知这件事，确实係假，唔使思疑啰。
第五十九节 讲论佛
查考佛书《普曜经》，出在天竺国，其爸净梵王，其耶摩氏，生一只太子，其名如来，姓释迦，号牟尼，在周昭王甲寅年四月初八日出世。自细游手好閒，到十九岁，四门游观，见人由生而老，由病而死，其心肝似觉极忧愁，即时就出家修道，戒杀生物，朝晡念经，食斋施济孤寡，烧衣破狱，超度样事，也教徒弟。係咁样佢老当时，生只毒疮，死在双树下。其嘅徒弟，作为佢既然落开涅，称佢做佛祖。自该时有等无赖之徒，丢开父母兄弟，亲戚朋友，削发食斋，换衣服，避税务，游手好閒，藉佛嘅名来讨食。这样教，传到西方几只国。到汉明帝当时，佛教嘅毒正入中国。到唐朝宪宗当时，有只极好嘅人臣係韩文公，劝谏该等佛骨爱烧开佢，或者丢落海肚去，就可以免开後患。又到宋朝淳佑当时，有只忠臣胡颖，做广东经略，使毁烂佛像，使该等和尚与尼姑还俗。又程夫子话，佛教害人还甚过杨墨嘅教。今下读书人，也被佢迷惑，题钱来做庵堂，寺观，施等田来养佢，想望佢保佑得福。殊不知拜佛至诚嘅，就係梁武帝，都被只将军，其名喊做侯景，害迫佢死在台城。今下看倒拜佛，该等国其国必定弱，子民又顽硬，可见佛教係冇益。佛教讲西天，就係天竺国，今下其名喊做印度与暹罗，隔条细海属英国管理。同这地球同一样物类，做也嘅称西天乐土，实在使人好笑。
第六十节 讲论轮回嘅假
释氏所讲转世生嘅事，大唔合人情物理。爱知自太初用坭土造人身体，吹气成人灵魂，故所以人生子，就有身体灵魂。禽兽虽然冇灵魂，也各从其种类来生。真神祝福佢话，生育众多，铺满通天大下，人物自然昌盛，使乜转世来生呢？人为万物之灵，各样物係被人用，做乜嘅使戒杀生物呢，又话善人转生做人，恶人转生做野兽。将来看到世人善嘅少恶嘅多，狂怕过开百零年，满下变做野兽啰。又话今生食肉四两，来生还肉半斤，世间人食肉嘅多，唔食肉嘅少，一生人食肉计唔出咁多，虽然转世千百摆咁多，也哙还唔清楚。兼且古圣贤，满下也食肉，时又係变野兽来还债吗？今下人极愚蠢。被释氏亵渎都唔知，翻下转有人信托生为真实。若有再世，不可结婚姻，惊怕娶到亚婆；唔好使牛，惊怕使倒祖公，时唔係背伦吗？或者话人冇轮回，样边有富贵贫贱呢？殊不知世人境遇有唔同，孟子话冇君子，野人冇人料理，冇野人，君子冇人养，这係天下嘅通义，与轮回有乜嘅关涉呢？一只人行善，照上帝嘅道来行，虽然当倒贫贱，灵魂也可以升天；作恶事来逆主，虽然当倒富贵，灵魂也哙灭亡。今下眼前穷富，有乜嘅相干呢？上帝将人死後嘅灵魂，必定有赏罚，断冇转世嘅理。吾等爱知人物嘅来由，就唔怕被人迷惑啰。
第六十一节 讲论观音嘅假
查考《观音经》，讲妙庄王嘅第三女，其名妙善，出家修道去白雀寺住宿。其爸听倒，用火烧开该间白雀寺，独独观音手揸杨枝投水浸死，故所以话佢化身为神。查考各国地舆，也冇妙庄国土。释氏想倒世间最易迷惑嘅，就係妇女，因咁样就塑女像，话係观音，能救苦难，诱惑妇女捐钱来养该等和尚与尼姑。一传百，百传千，唔知佢係假，有等冇孻子嘅求送子观音保佑，佢水浸死嘅求鱼篮观音，受苦嘅求千手千眼观音。殊不知有能为救人苦难嘅，独係一只救主，可知虚假嘅观音，样边有本事救人呢？
第六十二节 讲论阎王嘅假
上帝造天堂，用其来赏善人；造地狱，用其来罚恶人。罪有大小，罚有重轻，总係上帝主意与古人冇关涉。今下所讲地狱十八重，阎王十位，好比姓曹、麻、于、薛、昌、萧、包、寇、韩等，每只管一重，另外还有八重，就唔知那侪管。係咁假嘅说话，不过係骗愚蠢嘅人，难骗明白嘅君子。好比姓包侪，在宋仁宗当时，做河南开封府嘅官职，十分忠直，唔畏有权尊贵嘅人，又敢罚该等奸雄人。时常揸正王法，像铁石心肠噔，有犯法嘅人，虽然係皇帝嘅子孙，国家嘅亲戚，也唔赦其罪，必定照律法来审判。故所以当时，该等人称佢做铁面包公、阎王包老。等到包公死开以後，有等好事嘅人称佢做地狱阎王，又管阳间生死。试问下，宋朝以前唔曾有包公，係那这掌地狱，佢自家生死又那侪管理呢？诗经有写倒咁样话：“畏天之威，惟皇上帝。”意思即係话，独係畏上帝嘅威势，故所以愿吾等爱敬畏管生死嘅大主宰。
第六十三节 讲论杂神
世俗人嘅屋家，满下拜灶神，称佢做司命定福灶君。殊不知有命在天，唔係灶神管理。又话福自天申，也唔话灶神定嘅。若使得罪於天，唔係灶神可以赦免。有真神在天上鉴察，确实冇灶神来传命令。又看倒，该等有细子嘅屋家，在床脚下安倒只神来拜称佢床头婆。谁不知极污秽嘅地方，时都有神在嘅里吗？甚至到有等去拜树头、竹头、田头、石头、牛马龟蛇样事。也话佢係有神一只去拜，侪侪也去拜。十分可惜，人为万物之灵，反下转去拜该等物类。今下有主嘅光都唔亲就，这等人真係愚蠢啰。
第六十四节 讲论乜嘅缘故圣会唔准人娶妾
客问：上帝十诫第五条，使人孝敬父母，照道理本来係至着嘅。若使禁人唔好娶细婆，十分紧要过头。因为一只人冇孻子，若係唔娶细婆来讲，必定哙绝开後代。孟子都有话，做人孻子唔孝顺有三样，第一冇後代係大大唔孝顺。唔娶细婆来生子，难免唔孝嘅罪。
答话：一夫一妇係真神上帝定倒嘅。上帝始初造倒一男一女，配成夫妇，生育人类，唔曾造倒一男二女，一女二男，世间人唔可以任意来改。爱男女均平，互相亲爱正合。若係妇女无子，娶细婆生孻子来全孝道；倘或男人冇子，其妇女引诱别二只男人来生子来全孝道，时係咁样都合吗？故所以一女不可配二夫，一个男人唔可以娶两个妇女？兼且有子、冇子係上帝嘅主意，唔可以免强。孟子所讲无后为大，係指别二样，不过为舜帝推辞嘅意。好色嘅人时常借这等说话遮掩其心，殊不知淫心嘅就係唔孝顺孝顺嘅就唔淫心。兼且大婆与细婆嘅害处讲唔尽，咁多每摆互相残害，细婆得宠，毒死大婆，大婆唔宽容，又杀死细婆，破费家财，卖尽产业，子女终身仇敌，刀剑时常怀紧完身。係咁样，有乜嘅孝顺呢？孟子有话，游手好閒、好赌博、好打酒醉、恋慕钱财、私心妻子、任自家该耳朵来听淫声、任自已嘅眼来看淫色、好与人争斗，这咁多就係唔孝顺。伯夷叔齐两只人，满下也冇孻子，孔子称佢做贤人。故所以爱除开恶风俗，弃绝淫乱嘅说话，行正人伦，正可以称做孝顺。若使假借娶细婆嘅名，唔可以称做孝顺。
第六十五节 讲论传人做乜嘅离开屋家唔服事亚爸亚呢
客问：汝等传道嘅人，劝人生前服事亚爸亚，做乜嘅自己离开家中，唔朝晚服事，反下转又教别人咁样做呢？
答话：爱知父母有两样，一样係生吾嘅，一样係造吾嘅。上帝做造天下人类大父母，四海之内，满下也係兄弟。现今嘅人背真神、从异端、拜菩萨、各习邪事，这下唔打救佢等，必定受永远嘅苦。好比兄弟两个人，一只在屋家服事父母，一只出门做生理，有病，在屋家侪听倒，必定暂时离开屋家父母，去救兄弟若使听倒唔去，又话爱在屋家服事父母，众人也哙嫌佢唔知骨肉嘅亲，唔顾兄弟。今日吾等也係暂时离别父母，打救四海兄弟受苦，好比夏禹王治水，打救子民患难，八年离开屋家，三摆过其自己门边佢也唔得閒落屋家侪侪也，唔敢话佢离别屋家，唔养父母，反下转称佢做圣王。今下嘅灾难还广究过早时嘅水灾，倘若禹王再世必定教人改恶迁善，救身後灵魂。时尝看倒好多人在屋家，唔离其父母，但係唔听父母话，时常赌博、饮酒、食烟、偷盗，反下转其父母忧愁。佢添在屋家，又有乜嘅益呢？吾等虽然离开父母出门，但係有一定嘅所在，时常寄信安慰父母嘅心，付等银转来供养，又托亲戚朋友照顾，可以安心。或者有喜事与不测嘅事，即时就转屋家料理，这就係两全其美，样边话得唔孝顺呢？
第六十六节 讲论一只人唔好话进教係极难嘅事
客问：为救灵魂这件事本来係爱进教，但係实在艰难，係咁样，样边打算呢？
答话：据汝讲咁艰难係难信呀，抑或难守呢？这两样也唔话得係难。究其实，圣道有根有源，有古人嘅事迹可以做凭据。看倒天地万物、风云雨露、一年四季，各样物照其时候来生，係咁样，必定知有一只主来管理，信从十分易。又知吾等人为万物之灵，应接各样嘅事，但係到底也免唔脱死亡肉身，归转泥土，灵魂永久都在等待赏罚，或者欢喜，或者受苦，永远冇变。世上嘅苦刑还过轻，地狱嘅苦刑更较重，若使世上刑罚一死就脱，地狱嘅苦永久都有，唔可以脱得。好比大海嘅水，每年滴一点到也哙漏尽；普世上嘅沙，每年除去一粒，等久下子也哙去完。係咁样，都话进教艰难，就係甘愿受永久嘅苦啰。况且世间该等人求名求利，必定尽力营谋，为功名，日夜读书；或者耕田种作，经过好多风霜雨湿、朝夕勤劳。又或者飘流跋涉，想得钱财都不以为难，翻下转以奉教守诫为难，就十分愚蠢啰。殊不知唔曾入教嘅人，比较守诫更过难。样边讲呢？因为该等财主人，其心肝冇的忌惮，奸淫赌博、好打酒醉、食鸦片烟、倚恃有钱与人争斗，家破人亡。又该等贫穷嘅人、心肝贪婪、做贼打抢、无所不为，至到畀官府捉佢坐监打靶。独独拜上帝，虔心守十诫，心内时常也安，家中和气，咁样，守十诫有乜嘅难呢？故所以爱及早回头，服事上帝，倚靠主嘅功劳，就可以得赦罪，灵魂得救，享天堂嘅福乐。除此以外冇别样嘅法，可以救世间人啰。
第六十七节 讲论世间人虽然行善也唔可以得天堂嘅真福
客问：教外嘅人，其中也有善人，虽然唔拜上帝，靠耶稣，也行好多善事，好比施济贫穷，修桥整路，照推下这等人必定得天堂嘅赏。
答话：想得君王嘅赏，必定爱顺王法，忠心尊敬其君王；想得亚爸亚过爱，应当先行听话，顺行孝道。若使事君唔忠心，事父母唔孝顺，唔单止冇赏，翻下转惹怒气得刑罚。好比有一只做官嘅人，做各样事冇恶心，料理子民也称佢好，十分出名，独独唔尊敬其君王，兼且霸权压制添。係咁样，时可以得其君王嘅赏吗？又如同有一只人做人孻子侪，其行为十分好，交朋接友，满下唔敢嫌，独係唔孝敬父母又忤逆添。係咁样，时可以得父母嘅爱吗？故所以唔敬上帝唔倚靠耶稣，虽然行善事，到底唔可以得天堂嘅赏。今下世间人行善事，唔第真心悔改，不过想得名誉，勉强来做，既然得倒世人称赞，有名誉，这就係报赏，又还样边得得真神嘅赏呢？人知这样理，就爱寻入救主嘅门正着。
第六十八节 讲论入教唔可以延迟
客问：自起初辨问到这里，确实知上帝圣教正大光明，冇的嫌弃，可以使愚蠢人晓有智慧，骄傲侪晓谦卑，凶恶嘅哙良善，笃信顺道而行实在，生前得安乐，死後得天堂永福。但係今下唔得閒进教，等待来年正入圣会好吗？
答话：今日听明今日就爱信，这时醒悟即时就爱从。今下既然咁迟正知，做乜嘅还等待来年呢？好比有一只慈心嘅财主佬，佢加先讲明三日内想施济穷人，该等穷侪听倒就加先到嘅里等候，若使迟到，唔得得倒。咁样，唔係该等财主佬唔畀汝，係汝自家迟到嘅缘故。今下上帝赐倒道理来这世间，信侪得救，唔信侪就定罪，唔係上帝唔救汝。时常看倒好多有道理明白嘅人，其心肝初初想信，但係冇一定嘅主意，一日迟过一日，一年迟过一年。係咁样，罪恶日见日多，死期将到，就冇望得救嘅日。时可以等待来年吗？况且吾等人最紧要嘅，就係灵魂爱得救。享福嘅，即係永远同安乐、欢喜唱诗；受苦嘅，永远凄凉，咬牙线齿，做乜嘅还爱等待来年呢？因为人冇有唔死，长命短命冇定着，唔知在那哩死，也唔知那年死，即使诚心祈祷，警醒来等待，还狂怕唔到得天堂，係咁样来讲，还可以等待来年吗？兼且人嘅生命至薄弱，容易损伤，好比用一条丝线弔一只大钟，若使遇倒风雨侵害，忽然间一断，就哙跌下落。照这样比喻来讲，人也係一样，时好等待来年吗？娶妻生子待老亲，少时勤力唔使贫，池塘蓄水狂秋旱，积谷防饥免求人。这几俗话係讲，人情世务不过几十年光景，尚且爱预备；今下吾等，因为灵魂得救嘅事，时好唔加先入教吗？愿吾等兄弟姐妹，爱除净世间嘅繁华恶欲，朝晚祈祷，敬拜上帝，倚赖主嘅功劳，这就係我心所愿。
